Kenna Hernandez ta presenta su buki debut ‘Los Diez Encantos’ na Hulanda

 *Un historia di ficcion basa riba eventonan real

ORANJESTAD (AAN)/Malaga, Spaña  / Nijmegen, Hulanda: Kenna Hernandez, un escritora den su comienso, ta contento pa anuncia e lansamento di su prome buki Los Diez Encantos, un historia cu ta combina eventonan real cu elementonan di ficcion pa atrae y entretene e lesado.

            E buki a ser publica originalmente na Malaga, Spaña, y ta wordo lansa awor na Hulanda, caminda e ta biba actualmente. Los Diez Encantos ta un gran logro pa Kenna den su caminda como autor. E ta un studiante den su ultimo aña na Hogeschool van Arnhem en Nijmegen (HAN), caminda e ta studia Ingles. Pa despues e sigui su master den Literatura.

            E lansamento priva di su buki lo tuma luga na Nijmegen, den un ambiente intimo cu amigonan y conocinan cerca pa celebra e realisacion di su gran soño. E historia di Los Diez Encantos ta un mescla di realidad y ficcion, inspira pa experiencianan personal, pero crea pa toca un publico amplio.

            E ta considera su buki como un manera pa conecta cu otro hende, specialmente cu esnan cu ta aprecia historia cu ta refleha tanto e reto, como un triunfo di bida. Aunke

Los Diez Encantos ta su prome buki publica, no ta su prome obra skribi. El a skibi anterior buki den Papiamento y Ingles. Su siguiente meta ta pa publica su novela na Papiamento, cu ta contene un historia romantico historico di siglo anterior.

             “Ora mi tabata na scol, mi tabata lesa hopi buki na Ingles, Hulandes, Spaño y Papiamento. Na Aruba nos tin e bendicion di domina varios idioma y expande nos fuente literario ta un manera fantastico pa amplia nos conosemento y cultura”, e ta bisa.

            Kenna su soño ta pa inspira hubentudnan pa lesa mas y amplia nan horizonte via literatura. Pa pone historia disponibel den varios idioma, e ta spera di contribui na fuente educativo cu ta conecta cu un audiencia diversifica y multilengual. Pa mas informacion tocante e lansamento of pa programa un entrevista, por contacta: 

Tocante e autor:

            Kenna Hernandez ta un studiante na Hogeschool van Arnhem en Nijmegen (HAN), actualmente den su ultimo aña di studia Ingles. Naci na Venezuela pero bibando henter su bida na Aruba, actualmente ta biba na Hulanda, caminda e ta continua skirbi y traha pa publica su historia. Kenna su pasion ta skibi historia cu por conecta hende atraves di cultura y idioma. Su meta ta pa pone mas literatura disponibel pa hubentud di Aruba y rond mundo, specialmente na idioma cu no ta representa hopi manera Papiamento.