Ombudsman Jurima Bryson:
ORANJESTAD (AAN): Departamento di Ombudsman ta trata kehonan di tur hende, y no solamente di ciudadanonan di Aruba so. Segun cu Ombudsman di Aruba, señora Jurima Bryson a informa den diferente oportunidadad, e kehonan mester ta contra e instancianan manera ley ta prescribi. E mester ta un instancia di Gobierno of un instancia (fundacionnan) cu ta ricibi fondonan di Gobierno y tambe companianan estatal (WEB Aruba NV, Setar NV, NV Elmar y Serlimar SG).
No por entrega keho contra instancianan ful priva, cu execpcion di instancianan cu ta trata cu mucha y hoben pasobra esey ta prescribi den nos ley.
Sinembargo, tin biaha tin lasonan entre un instancia no gubernamental y instancianan of departamentonan di Gobierno. Un ehempel di esaki ta casnan di cuido priva. Ley ta prescribi cu e casnan di cuido mester tene nan mes na cierto reglamento. Si nan no cumpli, ley ta indica tambe unda por entrega keho contra casnan di cuido entre otro cerca IVA y DVG.
Den caso aki, no por yega cerca Ombudsman pa entrega keho directamente contra e cas di cuido. Pero si e persona ta sinti cu su keho no a wordo trata bon cerca IVA of DVG, e ora si e por entrega keho cerca Ombudsman contra IVA of DVG cu ta departamentonan di Gobierno.
Di e manera aki kehonan contra instancianan priva ta yega cerca Ombudsman y di nan banda, e departamentonan aki lo mester tuma accion of decision basa riba kehonan entrega cerca Ombudsman teniendo cuenta cu Ombudsman no ta sinta riba e stoel di autoridad.
