Karol Croes corona como Miss Universe Aruba 2023

E ta rumbo awor pa El Salvador pa Miss Universe

ORANJESTAD (AAN): E dama Karol Croes a keda corona Diadomingo anochi den Renaissance Conference Center como Miss Universe Aruba 2023.  Esaki durante anochi unda cinco candidata a competi pa e corona maximo, durante un actividad yen di baile, musica, y animacion di publico.

   E anochi aki tabatin un solo corona y un solo sjerp, y esey a bay pa Karol Croes kende a conta cu un apoyo grandi di publico, y cu a luci riba escenario.  E anochi aki tabatin dos representante di Miss Universe Organization di New York tambe cu a bin mira e certamen.

   Ministro Xiomara Maduro a keda encarga pa instala Karol door di pone sjerp na su curpa, y Ministro Ursell Arends a bin cu un estilo no-ortodoxo pa pone corona riba cabez di e Miss nobo.

   E anochi a wordo anima pa tres maestro di ceremonia, esta Thessaly Zimmerman, Nurianne Arias, y Sandra Croes.  E candidatanan cu a competi e anochi aki tabata Milenka Janssen, Lorraine Oduber, Anaisa Orman, Gavriëla Bozo, y Karol Croes.  E ultimo dos candidatanan riba escenario cu a keda tabata Gavriëla Bozo y Karol Croes.

   Awor cu el a haya e corona, Karol Croes ta preparando pa participa di 18 di November venidero na e certamen di Miss Universe 2023 cu lo tuma lugar na El Salvador.