Segun Sr. Isnardo Farro, kende kier a recorda e dia special aki a bisa cu na Noord, na Alto Vista, tin un capiya cu ta ser bishita diariamente pa un gran cantidad di hende, sea local of turista.
Awe e capiya ta celebra 70 aña, pero no a tende nada di algun festividad pa conmemora e fecha importante aki.
El a sigui conta cu na 1977 a recorda e existencia di e capiya cu e.o. un prenchi cu ta bisa “Grato recuerdo na 25 aña di existencia di Capilla di La Birgen di Alto Vista : 1952- 25 Mei 1977.”
Otro banda di e prenchi tin un oracion” Reina di Santisimo Rosario, Birgen di Alto Vista, Mi ta gradici Bo, pa asina tanto fabornan cu mi a ricibi caba di Dios, pa Bo intercession. Mira mi aki, yen di confianza, mi ta tuma mi refugio cerca Bo. Yuda mi, proteha mi, scucha mi oracionnan, pa tur ora, mi por keda semper Bo yiu, y un dia mi por mira Bo, banda di Bo yiu dibino, nos Señor Hesucristo, Amen”.
Na 2002 tambe a celebra 50 aña di lantamento di capiya cu basta fiesta. Un di organisadornan a bisa esey.
Ya cu e imagen original di Alto Vista a ser daña pa un persona bruha, a laga traha un replica di dje. Esun original a ser duna na H.O. Hospitaal. Eynan el a keda te dia cu el a bira algo cu ta para den caminda, e ora a dicidi di regala pastoor di Brazil e imagen original.
Quizas awor ta warda te 20277 pa celebra e 75 aña di existencia di e capiya.
Segun Sr. Faro na 1886 un pastoor a scirbi “Hopi tempo largo e bieunan di distrito di Noord a sigui e custumber cu ora nan pasa e lugar sagrado (esta e misa bieu di Alto Vista) di haci señal di cruz y reza pa descanso di e difuntonan cu aya riba ta warda binimento di Señor. Nan tabata pasa ayabanda pa bay pisca of pa bay recohe salo”.
Un otro señora a bisa den añanan cuarenta “Mi a bay resa na Alto Vista 33 aña largo. Semper un grupo di hende ta compaña nos. Ami no mas, pero bosonan lo mira un dia, un capiya cu nan lo traha na Alto Vista”.
Den e buki “Historia di Alto Vista” di p.fr. R.H. Nooyen o.p, publica na 1962 na pagina 98 ta scirbi: “Ta especialmente e trabao incansable di Señora Francisca Henriquez-Lacle (Shon Quita) a haci cu Alto Vista a haya un capilla nobo. Mario Lacle, kende a traha e capilla, a duna su cooperacion na un manera generoso, p.e. overtime riba su costonan. Parochianonan di Noord a yuda drecha caminda riba Sero di Alto Vista.
Alafin Mgr. A. van der Veen Zeppenfeld a bin bendiciona e capilla nobo dia 25 di Mei aña 1952. (e prome misa di Alto Vista ta fecha 20 April 1750). Den un procesion largo y bunita nan a hiba imagen nobo di Maria, Reina di Santisimo Rosario na Alto Vista. Aya mes hombernan, dos di cada parokia di Aruba a carga e imagen drenta e capilla. Miles di hende a asissti na e solemnidad ey”.
UN TIKI HISTORIA DI KAPEL
E Kapel a wordo lanta na 1952 na Alto Vista den un estilo di misa cu elementonan inspira ariba Dios. E edificio a wordo asina detaya y cuidadosamente construi cu a wordo usa solamente materialnan di construccion natural manera palo y piedra recogi for naturaleza. E Kapel a wordo construi ariba e lugar caminda aña 1750 e “kapel di Rosario" tabata. Despues di 1816 e kapel aki cu no por a wordo usa mas. Sinembargo e deboto nan a keda bishita e luga aki: “Ora cu na 1940 cu nos a bay bishita e lugar aki pa prome biaha, nos a haya e fundeshi di e kapel bieu marca cu piedra. Tabatin un cruz na unda e altar bieu tabata. Tambe por wordo mira e dos graf nan di fiscalnan. A haya un cantidad di bleki y pochi conteniendo flornan fresco, cu ta prueba cu tin hende cu ta bishita e lugar aki regularmente. E kapel a wordo construi den un tempo record di dos luna. E trahadornan tabata traha 10 ora pa dia, di cual dos ora ta sin pago”. Na e occasion di e celebracion di e prome fiesta di Siglo di e vicario apostolico na 1942 a wordo dicidi pa construi un kapel ariba e lugar di esun bieu. E cruz ariba e altar bieu, cu a ser warda, a wordo restaura pa Charles de Vos, escultor di Maastricht. Un comision a wordo institui pa recauda fondo. E compania di construccion Laclé a laga su hendenan traha 10 ora pa dia, di cual 2 ora tabata sin pago. Esnan cu tabata biba eybanda a habri un caminda te na e capel. Ariba diadomingo 25 di mei 1952 e kapel a wordo bendiciona door di Monseigneur Van der Veen. Desde e tempo ey ta wordo teni procesion pa celebra e Subimento di Maria na Cielo dia 15 di augustus. Banda di e caminda cu ta dirigi pa e Capel a wordo poni diez tres Cruz na e mesun distancia di otro cu ta simboliza e Caminda di Cruz di Cristo. E di diez cuatro Cruz ta representa un tabla cu ta simboliza e bahada di Cristo for di Cruz. E Cruz aki ta keda na e parti pariba di e construccion di e kapel, caminda e altar y e imagen Maria cu e Niño Hesus ta para. Pa preveni daño, causa pa e cabritonan, a construi un cura na e 4 bandanan di e Capel traha di transhi di piedranan recogi for di naturaleza. E entrada principal ta keda na e parti pabou di e kapel. For di e entrada aki e bishitantenan ta subi riba e tereno dilanti caminda e bankinan di piedra traha manera un mitar circulo ta situa den filanan di cuatro un tras di otro. Un di dos entrada ta situa na e parti pazuid. E kapel ta pertenece na e Obispado di Willemstad. E kapel ta situa na un lugar interesante cu hueyanan di un pueblo, probablemente di habitantenan for di awor te cu mas o menos 1816.
