E evento ta pa recauda fondo
ORANJESTAD (AAN): Fundacion Wiel Parandiando a yama un rueda di prensa diamars atardi pa anuncia cu nan ta organisando un evento pa recauda fondo.
Sra. Rasmijn, fundador di Wiel Parandiando Alegria ta nos bida y el a laga sa cu e motibo pakico el a lanta e fundacion aki ta pasobra ora cu e tabata chikito, cu no tabata tin scol, e tabata traha cu su mama kende ta traha cu personanan cu limitacion.
El a agrega cu eynan el a siña haci diferente cos locual a pone cu el a lanta c'un aprecio hopi grandi pa e personanan cu limitacion na Aruba. Actualmente e ta un studiante y pa e motibo ey e posicion di Presidente di e fundacion ta Sra. Maritza Maduro-Rasmijn, miho conoci como Brenda Rasmijn.
E motibo pakico a funda e stichting aki ta pasobra e stichting por haci ganashi, pero e ganashi aki ta bay bek den e fundacion.
Maritza Maduro a duna di conoce cu e meta di e fundacion ta pa enrikece e bida di e personanan cu ta fisicamente limita y esnan 60 plus transportando nan na actividad di bida diario, social, recreativo y educacional.
Tin den vision pa futuro bira lider den e mercado na Aruba di transportacion y recreacion di actividad pa integra personanan cu limitacion fisico bek den comunidad, a splica.
Nan tin 32 aña trahando riba e tereno na Aruba y pa añanan tin un buraco enorme pasobra e personanan cu limitacion ta mara cu nan no tin transporte facil pa yega na nan.
Pesey nan kier bin c'un fundacion na Aruba pa por traha y yuda hopi persona pa yega y participa na e bida cu "nos tur ta participando tur dia", Maduro a señala.
Pa e motibo aki Wiel Parandiando ta organisando e evento di un atardi di pasaboca arubiano. Esaki lo tuma lugar diadomingo awor 29 di Mei na Barcadera 39 di 5:30 pm pa 8 pm.
Miembro di e bestuur di e fundacion, Sra. Sheila Maduro a agrega cu e ta un persona cu tin 25 aña riba rolstul y e ta hopi contento cu e fundacion aki a lanta y asina por hiba y saca e personanan cu limitacion cu ta cera den cas pa bay bek den comunidad.
E concepto cu nan ta bay uza ta un auto cu por transporta un te dos persona. Aworaki a cuminsa cu e parti di e fundacion pa cuminsa traha di biaha ya cu tin un auto caba y e intension ta pa yega na un di dos auto, Maritza Maduro a indica.
Finalmente el a bisa cu ta resta tiki carchi. Esaki ta bay ta un atardi completamente arubiano, cu musica di Aruba.
Potret cortesia di: Facebook Page di Fundacion Wiel Parandiando
