Kailani Schwengle corona como Miss Youth Aruba 2026  

Beyesa hubenil instala Diasabra anochi

ORANJESTAD (AAN): Un multitud grandi di persona tabata presente Diasabra anochi na e establecimento di SharQy’s den Harbour House na Playa, pa presencia e momento cu Robin Croes-Ponson, como organizador di Miss Youth Aruba, a corona e dama hoben Kailani Schwengle como ‘Miss Youth Aruba 2026’.

   Kailani a wordo instala cu su sjerp door di e ganadora di aña pasa, esta Paula Acosta.  Despues di esey, Robin Croes-Ponson a pone e corona riba su cabez.

   Kailani tin 16 aña di edad y e ta bishitando Filomena College MAVO.  Su hobby ta e.o. make-up, diseña paña, y disfruta cada rato di lama rond di Aruba.  DIARIO ta corda cu e dama hoben aki ta competi tambe den landamento, y ta haci modelahe.

   Ora e MC di anochi, Jahee Bikker a puntra Kailani kico e ta mira mas importante awendia, y cu e ta para p’e, su contesta mesora tabata ‘Salud mental’.  El a mustra cu e ta un problema den silencio den hobennan, y e merece di haya prioridad y pa asina crea un futuro miho.

   Cu e corona awor riba su cabez, y cu e titulo oficial di Miss Youth Aruba 2026, claro cu Kailani Schwengle lo tin 1 aña di preparacion pa asina e por bay representa Aruba otro aña internacionalmente.  E dama hoben aki tin un estatura impresionante, y a demostra caba di tin e forza, e determinacion, y por ta un berdadero simbolo di un generacion di damanan hoben empodera, pues muhenan uc tin bos, cu tin vision, y cu no tin miedo di sigui nan meta.

   E corona cu el a ricibi, no ta djis un titulo, sino tambe un responsabilidad grandi pa sigui inspira, pa sigui guia, y sigui representa Aruba cu orguyo, respet, y amor.