ORANJESTAD (AAN): Julienne a bay cumpra su ticket pa wega di Mini Mega di Diamars 25 di October.
E no tabata sa ki number pa cumpra, y el a pidi ticket loco. Esaki ta numbernan cu e machine mes ta genera y imprimi riba bo ticket. El a pone 2 Florin acerca pa participa den e Mega Plus tambe.
E numbernan cu a sali e anochi ey tabata 01, 15, 18, 23 y e Megaball ta 01.
Esey ta exactamente e numbernan riba ticket di Julienne! Pesey mes riba Diahuebs el a acudi na oficina di Lotto na Playa pa reclama su premio.
Na yegada, e funcionarionan di Lotto a revisa su ticket pa wak si el a pone su firma y cuentanan di banco. Ora di scan, e computer a confirma mesora cu Julienne a gana 350.000 Florin cu Mini Mega.
Asina a cuminza cu e proceso pa transferi e premio electronicamente pa su cuenta di banco. Julienne abisa cu e ticket ganador el a cumpra na Lucky Star Lottery.
