E ta destina pa mayornan
- Instantaneo ta avisa ki ora alumno a drenta/sali tereno di scol
ORANJESTAD (AAN): Juliana School MAVO ta situa por lo pronto na Piedra Plat, caminda recien nan a traha un sistema di entrada na e scol, caminda a instala sistema di Smartcards reader na tanto e ‘Entrada’ y tambe e Smartcards reader na e ‘Salida’.
Na otro paisnan, e carchinan ak ta conoci como ‘Student Smart Cards’, y nan ta conecta cu Smart Card Readers cu automaticamente ta captura e presencia di e studiante, y asina automatisa e informacion di atendencia di e alumnonan. Na hopi scol, e ta wordo considera un gran exito. Pasobra instantaneamente e scol ta haya sa cua studiante no a drenta scol e mainta ey, of cua di nan a sali trempan.
Aruba awor tambe a haya un sistema asina, y a wordo instala na Juliana School MAVO. Ademas di ta notifica Administratie di Scol cu e alumno a yega klas, na mesun momento un mensahe ta bay na un app cu e mayor tin, pa asina haya confirmacion cu su yiu a drenta tereno di scol.
Y ora cu e sali, e mayor tambe lo haya un notificacion instantaneo cu su yiu a caba di sali for di e porta di salida. E mayor e ora ey no mester ni warda riba yamada di su yiu, pasobra e sa cu e por acudi na scol pa busca su yiu.
Na Merca a compronde cu e smart cards aki a haci bida di studiantenan mas facil, debi cu nan ta integra diferente aplicacion den un solo carchi, cu e potencial pa spaar tempo y placa, y trece seguridad na un nivel mas halto.
Siman pasa, scol a manda un mensahe pa tur mayor cu e sistema aki awor ta operacional. Nan a splica mayornan, cu awor nan por ricibi un mensahe asina cu nan yiu sea drenta, of sali for di scol. E message riba e app di ‘SmartCards’ ta duna informacion di e nomber di studiante, y ta menciona e horario exacto cu el a sea ‘drenta’ of e ora cu el a ‘sali’.
DIARIO a ricibi indicacion cu hopi mayor a haya e idea aki fenomenal. E ta trece trankilidad tambe, pasobra nan ta keda trankil sabiendo cu nan yiu ta riba tereno di scol y no riba caya. Awor e entrada di scol tin un porta pa ‘Entrada’ y un porta pa ‘Salida’.
