Juffrouw Tamara a haci un bunita descripcion di e Logo nobo di Imelda kleuterschool

Durante acto di develacion:

ORANJESTAD (AAN) – Diabierna mainta, e famia di Imelda Kleuterschool tabata tin un mainta hopi special, yena cu luz, color y alegria, cu develo di e logo nobo di school. Minister di Enseñanza y Director di SKOA tabata presente pa acompaña e cabesante, docentenan y alumnonan.

            Juffrouw Tamara a haci un descripcion masha bunita di  locual e logo ta representa. Den e centro di e logo por mira e nomber Imelda Lambertini, Patrona di e scol.

“Imelda a nace na Italia y e tabata un fiel devoto. Di chikito e tabata anhela di ricibi Santa Comunion. Dia 12 di Mei, aña 1333, bispo di Ascension, na un forma milagroso un hoos a aparece riba Imelda su cabes. E dia aki, Imelda a ricibi su Prome Santa Comunion y el a fayece di amor y felicidad di por a ricibi Hesus den su curazon.

            Asina tambe, Imelda a bira Patrona di Prome Santa Comunion. Pesey den su man, nos por mira un Santo Hostia. E Santo Hostia ta recorda nos cu Hesus a entrega su mes pa nos. Un simbolo di humildad y cu ta refleha e amor di Hesus, cual nos por demostra por medio di nos actonan, mustrando empatia. Tambe e ta recorda nos pa semper nos hiba Hesus den nos curazon.

Imelda ta simbolo di inocencia, cual ta refleha e inocencia di nos alumnonan. Riba Imelda su cabes, tin un corona di flor. E flornan ta simboliza e amor cu Imelda tabata tin pa flora y fauna.

            Regularmente, Imelda tabata piki flor y pone na altar. Tambe e flornan ta simbolo di fragilidad, mescos cu nos alumnonan cu ta fragil y ta den flor di nan crecemento. Rond di Beata Imelda nos por mira un arcoiris. E ta recorda nos e promesa cu Dios a haci na cada un di nos, cu semper e lo tey pa proteha nos den tempo bon y den tempo malo. Tambe e ta refleha e colornan, aura di alegria cu nos mester forma pa nos muchanan biba aden. Na e banner nos por mira un curazon na man robes y un na man  drechi. Esaki ta simboliza e lazo de amor di cas y di scol, pa nos alumnonan. Na cas ta brinda educacion y na scol enseñanza. Y hunto nos ta traha pa saca e maximo di cada alumno.

            Finalmente, e logo den su totalidad ta refleha humildad, inocencia, amor, alegria y spiritualidad, cu ta e basenan pa un crecemento sano. Na aña 1826, Imelda a ser declara Beata. Laga nos sigui e devocion di Beata Imelda; pone nos alumnonan central y hiba Hesus semper den nos curazon”, Juffrouw Tamara a conclui.