Judith Martha a celebra su di 50 añanan den baile cu ta su pasion

• Tambe a celebra 45 aña den scouting, y 40 aña den deporte y 40 aña den SAC

ORANJESTAD (AAN): E conocido Judith Martha ta celebrando su di cincuenta aña den baile, 45 aña den scouting, 40 aña den deporte y 40 aña den Stichting Arubaanse Carnaval, SAC.

   El a celebra e aniversarionan aki cu algun miembro di scouting, su grupo di baile, y ademas, su grupo di oracion. El a celebra su jubileo na Suikertuin, na Wilhelminastraat.

Judith ta activo ainda, y pa loke ta presentacion di baile e no ta mara su mes na ningun contrato, pero ora nan yam’e di un hotel e ora ey e ta bay cu su grupo haci presentacion.

El a corda ora cu e tabata mucha e no tabata sa cu e tabata tin caba e arte pa balia. Ta su mama a descubri esaki pasobra semper cu e tabata bisa Judith pa para straight e tabata lanta su pia. Esaki tabata un señal cu e tabata un “ballet juffrouw” manera el a expresa.

P’esey e ta aconseha e hobennan pa no haci algo pasobra e yiu su bisiña ta haci’e sino pasobra e mes kier y tin e habilidad. Baile ta un di e artenan cu e mucha mester scoge pa conviccion propio.

E ta bailarina di folklore pero e no a pensa cu e lo yega te baile clasico. El a siña baile clasico intensivo den Cas di Cultura y ora su docente a bay el a sigui cu e dos gran maestranan Diana y Sonia, y eynan el a cuminza cu jazz y baile moderno. E ora ey di biaha Teatro di Danza Simadanza a drenta  y el wordo hinca aden, kiermen el a keda bezig constantemente, sin sa kico ta weekend mes, y tabata actua den hotel tambe. E ta gusta balia! DIARIO ta yama Judith pabien y hopi aña mas den e actividadnan cu e ta stima.