ORANJESTAD (AAN): E weganan nobo aki obtenible na tur rebendedor di Lotto, ta igual cu un tipo di wega di raspaito moderno.
Pues bo ta cumpra un di e tantisimo wega di InstaCash y bo no mester warda e sorteo tuma lugar pa check si bo a gana.
Jovita a cumpra e wega di 20X The Cash, y a bay purba su suerte. El a bin realiza cu el a gana bon placa cune. Pesey el a acudi na oficina di Lotto na Playa pa reclama su premio.
Aki nan a scan e ticket den computer, y a confirma cu Jovita a gana 10.000 Florin cu e wega aki di InstaCash.
Mesora a start e proceso pa transferi e premio electronicamente pa su cuenta di banco. E ticket ganador a wordo bendi na Gwenny’s Lottery.
