Conferencia WOC otro aña na Aruba
ORANJESTAD (AAN): JOIA Aruba by Iberostar ta e anfitrion di e Conferencia Mundial di Shoco (World Owl Conference) 2026, cu lo tuma luga di 6 pa 10 di September 2026. E evento remarcabel aki lo ta e prome conferencia internacional cu lo tuma luga den Caribe.
E Conferencia Mundial di Shoco (WOC) ta un foro internacional di prestigio cu ta uni cientificonan, conservacionistanan y educadornan pa comparti investigacionnan y strategianan avansa global pa proteha e especienan di Shoco. For di su prome edicion na 1987, e WOC a worde organiza den ciudadnan manera Winnipeg (Canada), Canberra (Australia), Groningen (Hulanda), Evora (Portugal), Pune (India), y La Crosse (Wisconsin, USA). Na 2026, e evento lo yega Caribe pa prome biaha unda Aruba lo ta cla pa ricibi e expertonan di Shoco y organizacionnan mas prominente na mundo.
JOIA Aruba by Iberostar, un hotel di 5 strea situa na Eagle Beach, ta parti di Iberostar Hotels & Resorts, un compania internacional di hospitalidad cu ta compromete na promove un modelo di turismo responsabel, cu un enfoke fuerte riba colaboracion científico y proteccion di biodiversidad den e destinacionnan caminda e ta opera.
Como parti di e compromiso continuo aki, JOIA Aruba by Iberostar ta un miembro activo di e Shoco Supporting Community Conservation Agreement -un asociacion cu Bucuti & Tara Beach Resort y Aruba Marriott Resort & Stellaris Casino pa sostene e proyecto di conservacion di Shoco di Aruba Birdlife Conservation (ABC). E aliansa aki ta promove iniciativanan di conservacion y educacion basa riba comunidad, manera e instalacion di e “shoco burrows” den scolnan local, pa envolve hubentud di Aruba y fomenta un sentido mas profundo di mayordomia ambiental y pa sinti orguyo den proteha e simbolo nacional di e isla.
E proximo edicion lo tin un enfoke special riba e Shoconan cu ta biba riba isla y e retonan unico di conservacion cu nan ta enfrenta. E Shoco stima di Aruba (Athene cunicularia arubensis), un Shoco endemico y un simbolo nacional keri, lo hunga un rol central den e programa, dunando enfasis na e importancia di preservacion di habitat y proteccion di biodiversidad riba e isla.
Como preparacion pa e evento historico aki, Aruba Birdlife Conservation (ABC) a nombra Meneer Jelte Kuipers como Coordinador Nacional di e Conferencia Mundial di Shoco 2026. Meneer Kuipers ta un dokter naci na Hulanda cu a pasa casi siete aña trahando na Aruba. Meneer Kuipers ta un boluntario activo cu ABC y un defensor apasiona pa conservacion di parha y naturalesa. Den su rol nobo, e lo supervisa e organizacion local, coordinando cu partnernan tanto local como internacional, y sigurando cu Aruba lo entrega un experiencia di conferencia excepcional.
Greg Peterson, representante di Aruba Birdlife Conservation y e Comite Organizado di WOC 2026, a expresa su gratitud pa e oportunidad di trece e evento aki na Aruba: “Nos ta sinti nos humilde y orguyoso cu ABC a yuda trece e Conferencia Mundial di Shoco pa Aruba. E reunion aki ta ofrece un oportunidad remarcabel pa comparti conocemento, fortalece colaboracion internacional, y subi consciencia tocante e importancia di proteha nos Shoco y otro especie di Shoco vulnerabel rond mundo.”
Arnaud Le Lanchon, Gerente General di Iberostar Aruba, a expresa na DIARIO su entusiasmo pa ta anfitrion di e evento: “Nos ta honra di duna bon bini un conferencia internacional asina prestigioso unda expertonan for di rond mundo lo ta presente. E herencia natural di Aruba ta unico y precioso, y nos ta orguyoso di contribui na esfuersonan di conservacion global mientras cu nos ta mustra e bunitesa y biodiversidad di e isla.”
E Conferencia Mundial di Shoco 2026 na JOIA Aruba by Iberostar ta priminti di ta un milestone pa intercambio cientifico, “conservation advocacy”, y turismo sostenibel den Caribe, dunando enfasis na e biodiversidad unico di e isla y e compromiso continuo di Iberostar cu turismo responsabel.
