Job Fair 2023 ta un tremendo oportunidad pa esnan cu ta buscando trabao

Fernando Dirksen, PR di F&B Association

*Mas di 50 compania presente

ORANJESTAD (AAN) –Dia 13 di Juni proximo, lo tuma lugar e Job Fair pa 2023. Den entrevista cu señor Fernando Dirksen, Relacionista Publico di Aruba Food & Beverage Association, el a comenta cu aña pasa e evento tabata un exito total, no obstante cu a wordo organiza den corto tempo.

E aña aki a dedica mas tempo na e preparacion. Aña pasa nan a haya un average di 400 pa 450 persona, y e aña aki nan kier yega na doble di esaki.

E personanan cu a atende e Feria di Trabao aña pasa 10% a haya trabao y a keda cune. El a subraya cu tin scarcedad di trahador den F&B aworaki, y pesey nan ta keda haci e Job Fair aki.

Aruba Food & Beverage Association ta duna chens na tur nan miembronan cu kier participa den e Feria di Trabao, y cada un ta haya su booth. Tin mas di 50 compania cu lo bay participa. Ta bay tin mas di 400 cupo di trabao habri pa esnan cu ta interesa, bin join e Job Fair aki.

Manera ta conoci hopi hende cu tabata traha den e sector aki, durante Covid a perde nan trabao pero despues no a bay bek, pasobra tin cu a bay traha den otro sector y no a bolbe den e industria aki.