Joanne Kelly ta hopi contento y orguyoso di e produccion ‘Ban cende un bela’

Mama di Jorzinho Croes --- ORANJESTAD (AAN)  -- Señora Joanne Kelly, ken ta e mama di e hoben Jorzinho Croes, ta e productor principal di e grandioso proyecto presenta pa e hoben aki,

tambe a participa den e conferencia di prensa di lanzamento di e video nobo “Ban cende un bela”.

   Señora Kelly a bisa cu e como mama di Jorzinho tabata tin e placer di a forma parti di e lanzamento oficial di e cantica “Ban cende un bela” di su yiu homber.

   El a menciona cu su yiu tin un trayectoria largo, pasobra for di chikito el a participa den diferente festival tipico y musica ta su pasion, no solamente e ta cantante pero e ta musico tambe, hincando hopi tempo y pasion den e arte aki.

   E dama a conta cu sintando na mesa conhuntamente, un par di luna atras, a bin cu e idea cu e kier lanza su mes, oficialmente, como solista.

   El a agrega cu Jorzinho no ta pensa cu musica ta solamente entretanimento pero cu musica tambe ta pa concientiza e sociedad pa expresa e sentimento cu ta biba den dje.

“Di aki banda mi kier bisa cu nos a traha incansablemente, pa wak su nos ta haya e combinacion perfecto. Nos a wordo acerca door di un compositor no desconoci, cu a traha un bunita composicion cu e mensahe cu loke Jorzinho tabata identifica cune, ken ta John Fredy Montoya”, señora Kelly a comenta.

El a agrega cu e bunita trabao aki nan no tabata kier p’e bay perdi, y a hinca mas ekipo profesional den dje pa haci un produccion di halto nivel, unda nos a acerca un maestro tambe, no desconoci, Raul Piar, pa haci e areglo. E video a wordo graba den un studio tambe reconoci.

“Cu esaki nos a bisa cu nos ta bay pase den tur e radionan pa e mensahe, pero mirando cu esaki ta e prome stap di e proyecto aki, nos a bisa cu nos kier pa e biba den cada un persona di nos comunidad, pa e mensahe por yega; y ki miho manera cu den forma di un video clip? Eynan a nace e idea pa un video clip y e preparacionnan pa esaki, cu no tabata uno facil, pa hinca tur e set up di e escenanan tabata hopi dificil, y haya e personahenan corecto cu lo forma parti di e setting ey”, señora Kelly a relata. Ademas a acerca un hoben cu ta haciendo un trabao cinematografico, masha bunita mes, cu ta Danni Croes, cu mesora a bay den e mesun boto y a haci tur na su alcance pa forma parti y logra e meta.

E tempo tabata cortico, señora Kelly a acentua, pero nan a haya cooperacion di tur e personanan involucra den tur expresion artistico, hoben y grandi. Hopi talento te hasta cu tabata scondi a sali den e produccion aki. E dama a gradici cada un persona di e elenco, protagonista y tur cu tabata parti di e proyecto grandi aki, cu a keda bendiciona cu un mensahe masha special pa nos dushi Aruba.