Monsignor Luis Secco: ---ORANJESTAD (AAN)- Diaranzon 13 di April a tuma lugar na Pro-Catedral San Francisco de Asis, e Misa Crismal, cu presencia di Monsignor Luis Secco.
Den un entrevista cu DIARIO, Monsignor Secco a menciona cu e tabata tin dos aña sin bin Aruba pa e bendicion di azeta durante e Misa Crismal. Monsignor tabata hopi contento di wak e feligresnan hopi anima, hopi ruman hunto, unda mucha, hoben y adulto a comparti un bunita celebracion.
Monsignor Luis Secco a referi na un challenge of desafio cu tin, despues di Ricibimento y Confirmacion debi cu e ta ripara cu nos muchanan no tin mas motivacion, pero parce comosifuera cu nan ta puntra nan mes “y awo kico ta keda pa nos futuro?”
El a bisa cu akinan mester pone e sacerdotenan, catechistanan, mayornan, maestronan, tur duna animo na nos hobennan y bisa nan cu Fe Catolico no ta solamente pa bay Misa, pero tambe pa haci algun bon obra, bishita enfermonan, lanta un coro, bira sirbidornan di Misa, etc.
Mester promove esaki bao nos muchanan. Monsignor sa cu no tur ta bay sigui esey, pero un bon grupo mester sinti cu Iglesia no ta abandona nan, cu no ta comosifuera cu despues di confirmacion tur cos a caba.
Tambe Monsignor a bisa cu e pastornan mester tin e capacidad di atrae muchanan, aunke claro, no tur hende tin e don aki. Pero tin hobennan un tiki mas prepara cu por atrae otro hobennan; tin gruponan di oracion hubenil cu aunke a cay un tiki, Monsignor ta anima nan pa sigui.
Monsignor a duna un mensahe di bendicion y esaki ta pa nos comunidad por biba intensamente, e momento cu Jesus a entrega Su bida. Den e Triduo Pacual a papia cu Jesus ta bibo meymey di nos y cu E ta bin na nos encuentro pero nos tambe tin cu bay na encuentro di Jesus. “Un encuentro personal cu Jesus Cristo ta lo mas bunita di e Pasco aki. Jesus Cristo a resucita pa bo y pa mi, pa nos haya bida. No bida solamente material sino bida eterno, salvacion y esey nos tin cu yuda na nos pueblo”, Monsignor Luis Secco a expresa.
Un dia basta druk: Monsignor Secco a menciona tambe cu e tabata tin un dia basta druk Diaranzon cu a pasa. El bishita un exposicion na La Salle College, unda e alumnonan a prepara temanan cu ayudo di e catechistanan y nan a papia riba bida, bida Christian, etc. E tabata un bunita experiencia pa Monsignor Luis Secco.
Monsignor a bishita tambe algun hende di gobierno cu kendenan a papia tocante scolnan Catolico, por ehemplo di e Institucion di Scolnan Catolico SKOA, nan a sinta un rato hunto cu Monsignor Secco ta mire como un dia positivo.
El a desea pa Aruba sigui bon, cu nos comunidad mantene su Fe Cristian Catolico, y a desea un y tur un bon Siman Santo te Diadomingo di Resureccion.
