Jessy Beukenboom a traha den e servicio di gobierno di Aruba durante 41 aña y awor ta baha cu pensioen

ORANJESTAD (AAN): Recientemente, Minister di Enseñansa y Deporte Endy Croes a acudi na un evento special pa Sr. Jessy Beukenboom na Instituto Biba Saludabel y Activo (IBiSA).

Sr. Jessy Beukenboom, kende a traha den servicio di Gobierno di Aruba durante 41 aña a bay cu pensioen.

            Den ocasion special aki, Minister Endy Croes a dun’e un reconocemento pa contribui den e desaroyo di deporte di Aruba durante 41 aña. Sr. Jessy tin un trayectoria hopi largo den diferente funcion den deporte di Aruba. Na aña 1983 Sr. Jessy a cuminsa traha na IDEFRE na Sportcentrum San Nicolas como “sportcoordinator”, pero ya prome cu esey durante periodo di su estudio, e tabata yuda den e programa di vakantie di IDEFRE.

            Despues di varios aña di a fungi como director interino, a nombr’e como director di IDEFRE na aña 2006. Despues di esaki, Jessy a forma parti di e “management team” di IBiSA. Jessy a atende varios curso y seminario di deporte den exterior pa Aruba. Ademas di esaki, e tabata un atleta di baseball di calidad aki na Aruba. Hopi di nos por corda Jessy Beukenboom como un excelente pelotero di baseball pa Coca Cola Rangers.

            Durante su estudio na Merca, el a wordo nombra den e Hall of Fame di College Baseball Americano. Tambe, el a forma parti di diferente directiva deportivo entre otro, triathlon, boxeo y baseball.

            Finalmente, Minister Endy Croes ta gradici Sr. Jessy pa su aporte y dedicacion den mundo di deporte durante 41 aña y ta dese’e pa gosa di su pensioen merecidamente.