Jennely Winklaar corona como Miss Teen Mundial Aruba 2025

Corona door di Sandra Suarez-Croes

ORANJESTAD (AAN): Recientemente durante un agasaho prepara pa organizadornan di Miss Youth Aruba na un adres den Jupiterstraat na Playa, a tuma lugar un ceremonia special unda a corona e simpatica Jennely Winklaar cu e titulo di ‘Miss Teen Mundial Aruba 2025’.

   Jennely Winklaar no ta un desconoci, como cu e dama aki di 19 aña di edad, apenas aña pasa a keda corona cu e titulo maximo di Miss Youth Aruba 2024 representando distrito di San Nicolas.

  Sinembargo awor e ta preparando pa bay participa na un certamen grandi den exterior, yama Miss Teen Mundial, organiza pa Francisco Cortez, y pa tal motibo el a haya corona oficial como representante di Aruba.

   Na e ocasion aki, e conocido ex-Miss y tambe ex-vocero di Gobierno anterior, esta Sandra Suarez-Croes a haya e honor pa asina pone e corona masha bunita mes riba cabez di Jennely Winklaar pa asina e bira e Miss Teen Mundial Aruba 2025’.

   Den un entrevista cu DIARIO, Jennely Winklaar a indica cu e anochi tabata uno masha bunita p’e, como cu un trayectoria nobo a start aki, unda e lo bay representa Aruba na e competencia internacional na El Salvador.  El a indica cu na luna di Juli 2025 e ta bayendo ciudad di San Salvador na El Salvador pa e competencia.  E ta spera di por conta cu apoyo di publico, como cu esaki lo bay ta un experiencia nobo, y di awor caba ta priminti di lo haci su maximo esfuerzo pa asina trece e corona bek pa Aruba.

   Jennely Winklaar a gradici e organizador local Robin Croes pa e oportunidad di carga un corona asina importante, tambe na Alan kende ta haci su cabey, y e persona di makeup, kende ta Pierre.  Pero principalmente su mayornan y su ruman, y tur su amigonan cu ta para 100 porciento su tras pa yud’e haci esaki posibel.

   El a splica cu preparacion a cuminza di aña pasa Juli caba ora cu el a wordo corona como Miss Youth Aruba 2024, pues di e momento cu ey a cuminza prepara, no djis cu e parti di vestuario y accesorionan, pero tambe e parti fisico y mental pa por representa Aruba pa bay mustra loke e isla aki tin pa ofrece.