Reaccion di e president di OPPA
ORANJESTAD (AAN): Riba Diamars, e president di Organizacion OPPA, esta Ivo Valdes a reacciona riba e comentario di Parlamentario Hoek riba pagina 19 di DIARIO e siman aki, cu e titulo "Parlamentario Ricky Hoek ta puntra si OPPA ta un partido politico".
Den e articulo Sr. Hoek ta bisa cu Ivo Valdes, desde 2010 ta presta su mes pa metanan politico di un partido specifico. Mi ta kere cu Sr. Hoek ta confundi su rol como Parlamentario. Lagami refresca su memoria.
E trabou di un parlamentario ta pa represents pueblo di su pais den Parlamento, cu ta e organo mas halto. E tin e responsabilidad pa proteha y defende e interesnan di su comunidad. Un bon parlamentario ta mantene contacto cu e comunidad, pa wak kico ta e necesidadnan of ki problema nan ta enfrenta. Un bon parlamentario ta haci autocritica pa mehora su funcionamento y prestacion den Parlamento.
Un parlamentario ta prepara y dicidi riba leynan y regulacionnan cu ta regarda e bida di tur hende, pa asina trata na mehora nan calidad di bida. Nan ta debati temanan importante, duna recomemendacionnan na gobierno y expresa su opinon riba cuestionnan cu ta encera entre otro economia, salud, educacion y infrastructura.
Den un democracia tur hende tin derecho pa expresa su opinion, incluso un lider di un organisacion manera OPPA. Un lider di un organisacion ta seriala, comenta of critica decisionnan y maneho di gobierno den bienestar di comunidad of su grupo di interns. E ta su derecho y obligacion pa expresa preocupacion si e wak cosnan cu no ta bay bon segun su perspectiva na fin di cuenta, su meta ta pa trece un cambio positivo cu ta beneficia e comunidad, pa haya un gobierno mas husto pa tur.
Un bon parlamentario lo aplaudi ora un lider ta dedica na defende interesnan di su miembronan y publico en general y ta demostra pasion pa mehora e situacion di e pueblo.
Parlamentario Hoek lo haci bon pa considera e contendo di e critica y no haci atake personal. Yama e lider di OPPA pa un "politico" ta un manera pa desvia atencion riba e critica y busca pa minimalisa su mensahe.
Segun e parlamentario, Ivo Valdes ta mete den politica y ta puntra su mes si e miembronan di OPPA a duna nan permiso y autoridad pa esaki. “Mi kier a mustra sr. Hoek cu OPPA tin como meta pa atende interes material y inmatenal di su miembronan (art. 3 sub a statuto di organisacion). Pues no ta cosnan material so manera pensioen, costo di bida y salubridad ta conta, pero tambe topiconan inmaterial cu ta e.o. integridad y transparencia den gobernacion di nos pais.”
Si e parlamentario ta cuestiona e carta cu Ivo Valdes a manda pa Gobernador, e tin di realisa cu to ainda Aruba tin un democracia y e lider di OPPA tin e derecho pa cuestiona e maneho di e gobierno na e representante maximo di nos democracia!
Mi kier a referi sr. Hoek riba e ultimo rapport di Contraloria General (ARA) "Op afstand, maar toch dichtbij" cu ta un investigacion profundo riba institutonan cu ta riba distancia di e pais. E rapport aki e.o. ta e base di nos preocupacion.
“Por ultimo mi kier bisa sr. Hoek cu OPPA su portanan ta habri pa tur dirigente politico cu kier bishita OPPA y scucha e preocupacionnan di su miembronan.”
