Segun Inspector di IVA, señora Cheryl Rosa-Fingal:
ORANJESTAD (AAN): Inspectie Volksgezondheid Aruba (IVA) tin, entre otro, e responsabilidad y autoridad pa supervisa casnan di cuido na Aruba. Inspector di IVA, señora Cheryl Rosa Fingal, a duna di conoce den un entrevista cu Matutino DIARIO cu actualmente tin cuatro cas di cuido cu ta den un trayectoria intensivo, como resultado di kehonan cu e departamento a ricibi.
Segun Rosa Fingal, e kehonan por bin for di diferente fuente, entre otro famianan di pashent, trahadornan di e cas di cuido y, den algun caso, hasta for di director of un raad van bestuur cu ta expresa preocupacion tocante situacionnan relaciona cu nan propio personal of pashentnan.
Ora IVA ricibi un keho, e departamento ta evalu’e y clasific’e den e categoria corespondiente, dependiendo di e naturalesa y gravedad di e situacion. Un di e categorianan ta e kehonan regular, cu por wordo entrega por escrito door di un pashent of su famia contra un cas di cuido. Den e casonan aki, IVA ta monitoria si e persona cu a entrega e keho ta ricibi un contesta dentro di e periodo stipula. Si e persona no ta satisfecho cu e contesta, e por recuri na un ‘klachtencommissie’.
Otro categoria ta kehonan di calamidad, cu ta trata di situacionnan mas grave unda por tin daño serio na un pashent of hasta un fayecimento. Den tal caso, Inspectie ta inicia un investigacion, entrevista personanan involvi y haci diferente analisis pa determina kico a pasa y cua riesgonan por ta presente.
IVA tambe ta investiga kehonan di violencia den relacion di cuido. Esaki por inclui violencia di un dunador di cuido contra un pashent, pero tambe situacionnan unda dos cliente di un cas di cuido ta agredi otro den forma serio.
Rosa-Fingal a splica cu, tumando na cuenta e capacidad actual di personal, IVA generalmente ta drenta un cas di cuido ora tin un keho concreto. Durante un inspeccion, nan ta concentra principalmente riba tres aspecto: e personal, e capacidad di personal relaciona cu e cantidad di clientenan, e calidad di cuido, entre otro e maneho di remedi.
Ora Inspectie constata cu cierto aspectonan no ta na ordo, e cas di cuido por wordo poni bou di un trayectoria intensivo y ta haya un periodo pa implementa e mehoracionnan necesario. Si, sinembargo, tin riesgonan serio of inmediato pa siguridad di pashentnan, IVA por duna un instruccion conforme ley. Esaki por inclui e prohibicion temporal pa admiti pashentnan nobo te ora e cas di cuido coregi e deficiencianan identifica.
Cu e supervision aki, IVA ta busca no solamente reacciona riba kehonan, sino tambe obliga casnan di cuido pa mantene un nivel di cuido cu ta sigur, responsabel y digno pa cada pashent.
