Jennifer Reyes-Arends:
ORANJESTAD (AAN) Den entrevista cu DIARIO, Parlamentario Jennifer Reyes- Arends di fraccion di AVP a elabora tocante un reunion cu un delegacion di operadornan di UTV tours, cu su fraccion tabata tin e siman aki.
Esaki a sosode durante tratamento di un reunion cu tabata tin den Parlamento, den reces.
“T’asina cu nos a priminti nan cu nos ta sinta cu nan, y manera cu recess a pasa nos a sinta cu nan. Esey a pasa awe den un reunion sumamente informativo, unda cu nos a haya informacionnan cu talvez nos no tabata sa, di locual ta e manera con nan ta opera. Pa nos tabata importante di sa con nan a cuminza, kico ta e situacion, con el a cambia, eigenlijk, y con nan ta andando aworaki”, Parlamentario Reyes-Arends a señala.
E dama parlamentario a splica cu locual nan por a wak tin dos parti: “1. E parti di operacion cu nan tin diariamente, ta cu nan a adapta nan rutanan. Esey pa nos, fraccion di AVP, ta importante, en todo caso. Esaki kiermen cu nan mes a bay na nan ruta usual y na momento cu nan cera diferente ruta, nan ta bay scoge otro ruta, pero en dado caso cu nan tin cu palabra entre e tournan ken ta bay na unda, pa no crea un presion, por ehemplo cu 500 UTV tours ta bay mesun caminda, pa no ‘overbelast’, y no haya bo atrobe cu un situacion cu bo no desea”, Reyes-Arends a indica.
E Parlamentario a splica cu nan ta haciendo un regulacion di horario actualmente, locual ta sumamente positivo, pa locual ta e situacion di awo.
“Nan preocupacion ta tambe, ban bisa si na dado caso nan cera mas hopi, kico nan ta bay haci? Esey si tin e partinan unda cu nan por wordo perhudica den e sentido cu, kico nos ta haci como pais tambe? Kico nos tin pa ofrece nos turistanan caminda tur hende kier bay beach. E ora ey tambe ta bira un overbelast”, Parlamentario Jennifer Reyes-Arends a subraya.
