Charisse Hoe-Daly, PR Universidad di Aruba:
ORANJESTAD (AAN) -- Charisse Hoe-Daly, Relacionista Publico y Coordinador na Universidad di Aruba, ta sumamente contento y orguyoso, cu un biaha mas e por invita studiantenan di HAVO, VWO, MBO of esnan na cas cu kier busca un otro trabao, pa bishita e 'openhouse' di Universidad di Aruba, cu lo tuma lugar diahuebs 13 di October awo, cuminzando pa 5.30 or di atardi.
Esaki ta pa prepara e studiante pa e Aña Academico 2023-2024.
Tur bishitante lo wordo ricibi door di e Rector y tambe lo duna informacion tocante Arubalening, y di eynan lo sigui cu dos presentacion, di 6.30 pa 7.30, pa haya informacion tocante e facultadnan, y otro ronde di 7.30 pa 8.30 pm.
Hoen-Daly a bisa cu tur hende sa kico Universidad di Aruba ta brinda y loke ta bay wordo haci ta pone diferente tent pa djis e publico pasa y wak e servicio cu UA ta ofrece, pero tambe pa haya un tiki mas informacion di e studiantenan, y vooral papia cu e docentenan, y cu e studiantenan tocante nan experiencia.
“Pakico bay afo? Si na Universidad di Aruba nos ta brinda bo e educacion avanza”, Charisse Hoen-Daly a expresa.
El a subraya cu ya caba na December tin cu pidi Arubalening, y ora tin Examen na April-Mei, ta mucho cortico e tempo pa bay prepara y pensa kico bo kier sigui studia.
El a informa cu orguyo cu Universidad di Aruba a adapta su programanan, pa asina nan por brinda e studiantenan un hopi miho estudio Academico. Un Vice-decano di FEF ta bay papia di con Universidad ta adaptando su modelo pa bira un Business School, y tambe e Tienda di Ley pa asina duna yudanza na nos comunidad. Universidad di Aruba ta yegando mas cerca di pueblo, y e tey pa tur hende. Un invitacion ta bay pa tur studiante di scol avanza, y pa pueblo en general pa bin bishita U.A y haya hopi bon informacion.
