Minister Glenbert Croes:
ORANJESTAD (AAN)- Minister di Labor, Energia y Integracion, biniendo bek riba e tema di “Mision Ecuador” a bisa cu pa su persona ta un honor di reuni pa prome biaha, cu su colega Ecuatoriano Javier Vega, y e Embahadanan di Hulanda y di Ecuador, na Washington, ta haciendo tur nan esfuerzo pa crea e relacion aki, cu ta conduci na dicho reunion.
E mandatario a expresa cu Aruba no por warda hopi pa tin opcionnan riba mesa, mientras gobierno ta canando tambe e trayecto parallel di e nota diplomatico of peticion cu gobierno di Aruba, oficialmente ta haci, na Gobierno Mericano.
“Manera mi a bisa, nos ta cautelosamente optimista pasobra e señal cu Minister Presidente a haci, a raiz di su solicitud na Secretario Blinken di gobierno Mericano, a wordo ricibi cu positivismo”, Minister Glenbert Croes a indica.
E mandatario a agrega cu e tin speranza cu un bez cu e solicitud oficial wordo haci, e wordo aproba, pa asina Aruba por cumpra HFO cu descuento substancial for di Venezuela.
El a reitera cu Ecuador ta sumamente impresiona cu e transaccion energetico cu ta encaminando na Aruba, y nan tin e deseo pa den cuadro di tur esaki yega na cooperacion cu gobierno di Aruba. Y, pa loke ta trata e cooperacion aki entre Aruba y Ecuador, e mandatario a pidi e director di Utilities Aruba NV, pa acapara y coordina e posible cooperacionnan cu lo por sali.
E minister a agrega cu esaki ta temanan adicional cu lo wordo atendi, reiterando cu e prome meta ta pa logra un acuerdo specifico cu Petro Ecuador, den e caso aki cu Fuel Marketing Supplies Aruba, cu ta 100% subsidiario di RdA, un compania 100% di Aruba, lo ta esun encarga di e transaccion aki, mientras tanto cu ta wardando riba gobierno Mericano pa tuma un decision y pueblo di Aruba por haya un alivio pa cu prijs di awa y coriente.
