For di un iglesia tradicional pa un iglesia sinodal
ORANJESTAD (AAN): Pastoor Toti Fuentebella, Pastoor di Parokia Santa Filomena di Paradera, ta extende un cordial invitacion na tur parokiano; gruponan di Paradera, hubentud, mayornan, habitantenan di Paradera cu fe catolico of otro, pa asisti na e Asamblea Parokial Sinodal diasabra awo 26 di maart na misa di Paradera. Registracion ta cuminsa for di 8or mainta y pa 8’or y mey lo inicia cu e asamblea cu ta
programa pa finaliza pa 12or di merdia.
E obhetivo di e Sinodo “Un Iglesia Sinodal – Canando Hunto”
Pa biba un proceso eclesiastico participativo cu ta ofrece cada fiel sin distincion di credo, e oportunidad pa expresa su mes y pa ser scucha na beneficio pa actualisa e mision di Iglesia.
(Fuente: informacion adapta di Comision Nacional Sinodal Aruba, informacion adapta)
Kico ta Sinodo di Obispo y dicon Asamblea Sinodal Parokial
Un sinodo ta un asamblea di obisponan di tur parti di mundo cu ta reuni hunto cu e Papa ta convoca. Pa hunto trece proposicionnan comun pa e desaroyo di mision di Iglesia Catolico den nos tempo. E biaha aki Papa Francisco ta haya cu ta bon pa tende tambe di e Pueblo di Dios rond mundo. Pa e motibo aki tur persona sin excepcion di credo ta haya e yamada pa participa na e sinodo aki por medio di e asambleanan sinodal den cada parokia.
Kiermen nos tur ta haya e oportunidad unico pa participa den proposicionnan pa wordo presenta na Vaticano pa contribui na e mision di Iglesia. E sinodo aki a keda habri na oktober ultimo na Vaticano y ta culmina otro aňa. Awo ta nos oportunidad pa participa na e sinodo aki, door di participa na e asamblea parokial y trece nos dudanan, inkietud, pensamento, ideanan padilanti cu lo yega Vaticano den forma di proposicion. Kiermen nos como pueblo a haya e oportunidad pa tin un palabra mas eleva den Iglesia Catolico.
Comunion, Participacion y Mision
P’esey Papa Francisco ta invita e comunidad global, tur hende sin excepcion di credo, pa reflecciona riba e tema di “Un Iglesia Sinodal – Canando Hunto” cu ta decisivo pa e bida di Iglesia y su mision. E reto aki lo conduci na spiertamento pa un Iglesia renoba proponi pa Concilio Vaticano II. Ta un regalo y tarea pa Cana Hunto y reflecciona hunto riba e caminda cu a ser presenta. Iglesia ta disponibel pa desaroya via su experencia cu e proceso aki pa yud’e biba su Comunion, pa logra Participacion y pa habri su mes pa Mision.
Registracion ta importante
Pues tur tin e oportunidad pa participa na e reforma di Iglesia Catolico por medio di su mision adapta den nos tempo. No perde e oportunidad unico aki cu Papa Francisco a duna nos.
Pa proposito organisatorio, nos ta pidi bo encarecidamente pa registra no mas tarda diahuebs awo 24 di maart, na e siguiente personanan;
Ronnie Croes via email: This email address is being protected from spambots. You need JavaScript enabled to view it. of cel. 567-4133
Raquel Brett via email: This email address is being protected from spambots. You need JavaScript enabled to view it. of cel. 566-9233
Oficina di Parokia via email: This email address is being protected from spambots. You need JavaScript enabled to view it.
Of na Pastorie di Misa Sta Filomena, Paradera: telefoon 582-1400 durante ora di oficina: diamars y diahuebs entre 5:00pm – 6:30pm.
Si acaso bo persona no logra registra prome cu diahuebs 24 di maart, por haci esaki tambe diasabra awo 26 di maart pa 8or di mainta na misa di Paradera prome cu e Asamblea Sinodal inicia. Pastoor Toti Fuentebella hunto cu e miembronan di e Comision Asamblea Sinodal di Parokia Santa Filomena cu grato placer lo yama bo bon bini.
