Un di su motibonan pa lanza curso: “Con pa goberna un pais”:
ORANJESTAD (AAN)—Den conferencia di prensa, Dr. Jayburtt Dijkhoff, director di Fundacion SIKI, a menciona cu un di e motibonan principal pa cual e ta lanzando e curso “Con pa goberna un pais”, y cual ta su importancia pa Pais Aruba, ta cu e investigacion cu su persona a haci pa Fundacion SIKI, ta mustra cu tin un cultura di miedo y un cultura di desconfianza aki na nos pais.
“E cultura di miedo aki ta riba henter e linea tur organizacion y tur persona cu famia aki na Aruba. E cultura di miedo kiermen, cu bo no ta papia sin mas den publico over di bo opinionnan, no tin e confianza necesario pa vocifera tur ora pa expresa e preocupacionnan cu ta biba den pueblo, y semper ta pisa un rato con ta bay expresa un rato pa no tin cualkier represalia. Y di otro banda tin un cultura di desconfianza”, Jayburtt Dijkhoff a señala.
Esaki kiermen cu tin desconfianza di pueblo pa cu Gobierno, y esey hopi biaha ta refleha tambe den comportacion di voto, y tambe den busca ministernan hopi biaha pasobra mester un permiso, mester un yudanza, mester un trabao… “Gobierno ta suppose di tin procesonan transparente, cu e ciudadano por bay un departamento cu e sa kico por spera, kico ta su derechonan, na ki tempo e por haya un contesta, y no ta depende mas di e asina yama nepotismo”, Jayburtt Dijkhoff a expresa.
