Investigacion Cultural Caribense y Artistanan di Caribe a inspira futuro colaboracion

Where Culture Lives a conclui

ORANJESTAD (AAN): E proyecto di investigacion yama ‘Where Culture Lives’ (WCL), cu a wordo lanta door di Ministerio Hulandes di Educacion, Cultura y Ciencia (OCW) y ehecuta door di Lemonade & Partners (Jorien Wuite, Ludmila Duncan, Gregory Richardson, y Elton Villareal), a conclui cu un simposio riba practicanan cultural Caribense na Den Haag.  Organiza pa OCW, e evento a reuni legisladornan, investigadornan, organizacionnan cultural, institucionnan di investigacion, artista y stakeholdernan for di rond Reino Hulandes.

   E proyecto a presenta e prome e prome estudio di referencia encuanto practicanan cultural na Aruba, Bonaire, Corsou, Saba, St. Eustatius, y St. Maarten, cu a brinda perspectivanan nobo riba con e ta wordo practica, con ta experiencia, ta transmiti, y ta mantene e cultura den region Caribense.  Mas di 580 persona a wordo encuesta, cu 131 informante clave, mas di 100 participacion den e proceso di validacion, y 32 proposicion artistico a contribui na e investigacion.

   Programa special pa Caribe: Un caracteristica diferente di e proyecto, tabata e premio artistico di ‘Where Culture Lives” di Lemonade, cu a invita esnan creativo pa contesta un pregunta simpel pero profundo: “Unda cultura ta biba na bo isla?”

   E seis artistanan cu a gana (Ariadne Wever di Aruba, Dillon Rannou di Bonaire, Principio/Genesis di Corsou, KYRO di St. Maarten, Rhea Courtar di St. Eustatius y Angelita Peterson di Saba), cu e apoyo di OCW, a participa den un programa special rond di e simposio, cu a enrikece e combersacionnan mas amplio riba identidad, creatividad, y pertenencia, y asina a demostra e balor di arte tanto como practica cultural y tambe como fuente di conocemento.

   Conclusion principal y recomendacion: Ludmila Duncan a presenta e resultadonan di encuesta y a mustra: “Loke e data ta indica, ta cu cultura ta ricibi apoyo di diferente forma na nos islanan.  Algun comunidad ta contribui via di rednan solido di boluntario, manera na Saba, y di asociacionnan cultural, manera na St. Maarten, y otronan via di entrepreneurship creativo y genera entrada manera na Corsou.  Tur ta partinan esencial di nos ecosistema cultural Caribense.”

   E estudio a confirma oportunidadnan pa reforza e conexion entre cultura, creatividad, turismo, y desaroyo economico mientras ta salvaguardia autenticidad y e apropiacion di comunitario.  Tambe a enfatiza e necesidad di conocemento mas profundo di e economia oranjo y di haci mas investigacion den futuro.

   Gregory Richardson a enfatiza cu “e desaroyo cultural sostenibel ta rekeri tres intervencion complementario: Un monitoreo contiuo, vinculonan mas solido entre educacion cultural y desaroyo di talento, y mehora colaboracion regional entre e institucionnan cultural, e profesionalnan, y esnan responsabel di ley y politica.”

   Sigui e combersacion: Elton Villareal a mustra cu “e sesionnan di validacion a demostra cu e investigacion cultural ta fortalece ora cu e resultadonan ta wordo debolbi na comunidad pa refleho, interpretacion, y dialogo real.”

   OCW a indica cu nan ta prepara pa traduci e informacion pa mehora su accesibilidad na tur isla.  Mesun momento, Lemonade ta desaroyando un plataforma digital interactivo cu lo presenta e resultadonan di investigacion, e contribucionnan artistico, y e datonan comparativo na disposicion di un publico mas amplio, incluyendo profesionalnan di cultura, legisladornan, educadornan, y investigadornan.

   Gradicimento y futuro: E team di e proyecto a expresa nan sincero agradecimento na tur encuestadornan, profesionalnan di cultura, artistanan, coordinadornan na e islanan, esnan cu a duna contesta, socionan experto, miembronan di NGO’s, participantenan di focus-groups, y representantenan di Gobierno a contribui na e investigacion y esfuerzo colectivo.

   Aunke ‘Where Culture Lives’ formalmente a finaliza, e colaboracion cu el a fomenta lo sigui.  Lemonade y nan partnernan ta explorando un consorcio amplio di Caribe dedica na bin cu un mapa cultural, investigacion colaborativo, intercambio di conocemento, y e cooperacion regional, cu un enfoke inicial riba e investigacion mas profundo di e “economia oranje”, mientra sta sigui sostene desaroyo cultural mas amplio den henter e region.

   Jorien Wuite aki a declara: “Nos ta spera cu e rapport aki no ta wordo considera como un punto final, sino e base di un framework Caribense comparti pa e conocemento cultural, e cooperacion, y e futuro siguimento den henter nos region.  Nos ta sigui di ta comprometi pa sostene futuro iniciativanan cu ta fortalece e practicanan cultural y patrimonial di e islanan.”