Partido MEP na Marisol Lopez-Tromp:
ORANJESTAD (AAN): Partido MEP a tuma nota cu un biaha mas Parlamentario Marisol Lopez-Tromp no por funciona y sigui haci su trabao mientras cu investigacionnan di Arubahuis no keda cla.
Algo cu ta incomprendibel pasobra ta hopi trabao un parlamentario tin pa Lopez-Tromp ancra su mes na na un meta y tranca su mes un trabaonan como sirbidor di pueblo. Mientras tambe cu varios biaha Prome Minister di nos pais a splic’e cu e investigacionnan na Arubahuis ta biniendo cla y enfatisando cu manera e investigacionnan ta cla, Prome Minister mes lo anuncia esaki. Pero un biaha mas Lopez-Tromp ta mustra cu e no tin confianza den nos profesionalnan di Centrale Accountantsdienst (CAD).
Manera conoci, momento cu Prome Minister a worde notifica di iregularidadnan na Arubahuis, e mes, como e minister encarga cu Arubahuis, di biaha a pidi Centrale Accountantsdienst (CAD) pa haci un investigacion. E investigacion aki a cana su caminda y lo ta cla proximamente. Y Prome Minister a enfatisa tambe, cu e mes lo informa Parlamento tambe ora e resultado yega den su man.
Manera den hopi ocacion Lider di MEP a expresa, esun cu a haci malo, sin importa color politico of si e ta conoci of famia, e mester sinta riba su blaar. Esaki ta e posicion di Partido MEP tambe cu ta kere semper den integridad. Y si den Arubahuis cosnan a bay malo, e personanan responsabel lo worde teni responsabel tambe. Mientras tanto, Partido MEP ta conseha Parlamentario Lopez-Tromp, “tin tiki pasenshi, confia profesionalnan di CAD cu nan trabao, dal un cop’i kofi of un te di kukwisa pa baha bo ansha y sigui cu bo otro trabaonan trankil. Manera investigacion ta cla, bo lo worde informa debidamente”.
