Segun CEO di ATA mustrando cu:
ORANJESTAD (AAN): Ronella Croes, CEO di Oficina di Turismo (ATA) a duna di conoce cu nan tin un bista di loke ta pasando cu criminalidad y cu ta afecta turismo. Tin datonan di polis, el a bisa, pero tin e 'feedback' y dialogo cu Cuerpo di Polis.
Croes a indica cu nan ta haya datonan usualmente di Tourism Security Patrol Aruba cu ta cay bao di Aruba Hospitality & Security Foundation (AH&SF).
E ta resalta e importancia cu ATA ta duna na esaki y el a menciona cu na 2011 ATA a tuma e financiamento di AH&SF over. Esey ta e momento cu ATA a bira independiente y a dicidi cu ta bay carga e fundacion aki.
Na 2015, ATA su colaboracion tabata di 720 mil Florin y den e presupuesto di e aña aki tin 2.5 miyon Florin. Cu e fondonan aki cu ta locual e turistanan ta paga (Touristenheffing), no solamente a mas cu redobla e contribucion, pero pa medio di esaki por papia awor di un ekipo similar na Visibility Team, cu ta den hopi di e zonanan basta ocupa pa e turistanan. Nan ta raporta mensualmente kico ta loke nan ta encontra, Ronella Croes a indica.
Aworaki Aruba ta den temporada halto y tin mas incidente tambe. E incidentenan ta varia di robonan chikito, pero hopi di e asistencianan tin di haber cu asuntonan di hospitalidad manera preguntanan di unda pa bay, con pa yega un caminda, con pa haya un botica, etc.
E intension ta pa bay amplia esaki pa asina wak con por sigui yuda KPA den locual ta e trabaonan, Ronella Croes a remarca.
