Esun prome cu a clasifica e condicion aki na 1866
ORANJESTAD (AAN) E Down Syndrome ta hiba su nomber na honor di docter John Langdon Down, un docter Britanico cu tabata e prome cu a clasifica e condicion na 1866. Docter Down a cuminza su carera di Medicina como Medico Hefe di Earlswood, un Institucion pa personanan cu incapacidadnan intelectual y di desaroyo.
Prome cu Earlswood, John Down no tabata tin experiencia den e cuido di personanan cu e tipo di discapacidad aki, pero algo den dje a capta su interes. E tabata mira su balor y humanidad, den un epoca unda otronan no tabata mira esaki. E tabata disfruta, autenticamente, di ta cerca di e personanan aki, y tabata enfurece masha door di e manera cu nan tabata wordo trata: castigo fisico tabata comun, e condicionnan di higiene tabata deplorable, tabatin un nivel halto di mortalidad y nada agradable tabata tin, of cu tabata bal la pena, pa e pashentnan.
Docter John Down a insisti den haci un cambio. El a contrata personal nobo, y a exigi un atencion y higiene adecua pa e pashentnan. El a prohibi e castigonan y a percura pa cursonan di manualidad y pasatempo pa su pashentnan.
El a tuma nan potretnan masha bunita, bisti cu nan miho pañanan y trahe y a laga nan pose di un manera elegante. El a utiliza su coleccion di mas di 200 fotografia, pa respalda su descripcion clinico di e Down Syndrome, señalando e caracteristicanan fisico cu el a nota, como tambe otro observacionnan clinico.
Na 1868, el a cumpra un mansion inmenso, pa alberga personanan cu Down Syndrome. Na lugar di utilic’e como Institucion el a sigura su mes, cu e mansion lo a cumpli cu e standardnan di mas halto di comodidad y higiene. Tur persona cu a ingresa eynan a haya educacion priva. Nan a wordo siña con pa monta cabay, con pa haci hardineria y obranan di man, y a crea pa nan espacionan creativo.
Dr. Down a laga traha un teatro chikito anexo na e mansion. E mansion aki a wordo yama “Normansfield” y ainda ta sigui para riba su pia den Reino Uni. E ta yama awo “The Langdon Down Center and Normansfield Theater”.
Ta bon pa destaca cu e nomber “Down” tin nada di haber cu retraso ni predisposicion, ni cu e diagnostico di Down Syndrome, simplemente e ta hiba e nomber di un docter cu un maraviyoso sensibilidad y un ser humano extraordinario.
(Autor: Investigador Alfonso Lovato)
