International School of Aruba a observa Dia di idioma Spaño

ORANJESTAD (AAN): Durante luna di April, International School of Aruba situa den Wayaca Residence, a celebra cu orguyo e “Dia di Spaño” di Nacionnan Uni,

cu ta un dia dedica pa reconoce e legado cultural rico y historico di e idioma Spaño rond mundo.

   E dia aki ta honra Miguel Cervantes, kende ta un di e autornan mas grandi di e idioma Spaño, kende a fayece na April 1616.  Spaño ta un di e seis idiomanan oficial di Nacionnan Uni, y mas di 500 miyon hende ta papi’e rond mundo.

   E celebracion na Scol ISA a inclui musica y baile Spaño, lectura di literatura y poesia Spaño, delicioso pasaboca Spaño y Latino Americano.  Actividadnan cultural cu ta enfoca riba e paisnan di habla hispano.

   DIARIO a compronde cu e tabata un forma maraviyoso pa aprecia e diversidad, e beyeza, y e importancia mundial di idioma Spaño.  Nan ta manda bisa ‘Gracias’ na tur cu a yuda haci e dia aki uno special.