Interesante apertura di exposicion di pintura di Mario Carrera “E balor di nos piscadornan”

Cu reconocemento pa tres piscado:

ORANJESTAD (AAN) – Diabierna ultimo, dia 13 di October anochi, e pintor Mario Carrera a presenta su di dos exposicion yama “E balor di nos piscadornan” den e sala di UNOCA.

            Minister di Endy Croes y Minister Ursell Arends, tabata presente den e ceremonia di apertura. Y como Maestro di Ceremonia Ivan Kelly di Telearuba, a yama Mario Carrera bin dilanti, y el a duna un relato di locual a sosode na 2009, cu el a cay for di un dak y a worde declara paralitico. El a expresa cu e momento ey e no tabata kier nada mas di e mundo aki, solamente muri y no kier a mira nada di Hospital.        

            E no kier a tende nada di Dios ni di oracion. Pero, el a conta con un oracion cu el a ricibi for di un tanta na Venezuela, cu el a hinca den un lashi na hospital, pero cu despues a reza tres dia y tres anochi, a haci e milagro cu su FE a renace y contra tur diagnostico el a logra lanta for di su cama, cuminza dal stapnan, te cu tempo despues el a wordo opera na Colombia dia 3 di October 2010, exactamente un aña despues cu el a cay.

            El a cuminza cana bek manera mucha chikito, y hunto cu su señora, el a bishita Misa Niño Jesus pa gradici’e. El cana for di entrada di Misa te altar sin cruck. E pastor a puntr’e si e ta un milagro, y el a contest’e cu SI. El a conta cu e tabata un carpinte fini, pero e no por a haci nada mas di e trabao aki, anto su señora a bise pa e cuminza pinta, locual nunca prome el a haci. Su señora a trece tur material pa e pinta y berdad el a cuminza haci’e, y a sigui cu e diferente expresion di pintamento te cu e yega na acrylic.

            Asina a haci su prome expo na 2013 y awo e di dos, diez aña despues. El a gradici UNOCA cu a kere den dje, y asina a progresa. E expo aki di 2023 el a dedica na e piscadornan di Aruba, pasobra e tambe tabata piscado y sa kico ta pasa riba lama, y con duro nan ta traha pa nan famia, y pa e pueblo henter di Aruba. Nan a hisa e economia di Aruba pero nan ta wordo lubida.

            Asina tambe a reconoce tres baluarte den piscamento, cu semper Mario a pensa riba nan: Rolly, Juan, cu no a presenta debi na kibranto di salud, y Papa Domi, su di dos tata cu a cuid’e for di chikito. Minister Endy Croes tambe a hiba palabra di felicitacion, reconocimento y admiracion pa señor Mario Carrera.