Interes Mundial pa Baha: Proteha bo mes Contra Inflacion cu Oro Fisico

Analista Simon Waslander:

ORANJESTAD (AAN): Analista local Simon Waslander, a splica cu e siman aki cu a pasa tabata uno sumamente importante pa mundo financiero. Ambos Banco Central di Merca, esta e US Federal Reserve (FED) y European Central Bank (ECB) a basicamente den palabranan hopi fini y sofistica indica cu nan ta bay baha interes na Juni.

   Combina esaki cu data duidelijk cu e economia di Europa ta den un recesion caba bezig ta wak cu inflacion ta mas halto cu crecemento economico volgens raportahe di ECB mes publica e siman ki.

   Tambe nos ta wak tur sorto di indicator mustrando cu finalmente e economia mes “riba e hood” a cuminsa slow. Esaki den forma di “massa ontslagen” anuncia e lunanan cu a pasa cu tabata na mas halto desde 2009. E data aki ta uno masha espantoso pa economia di Merca y dus indirectamente pa Aruba.
   Interes pa Baha: Awo cu inflacion ni full bou control FED y ECB a indica cu nan lo baha interes, esaki lo causa e segunda ola di inflacion cu a premira na November y December 2023 den articulonan pa Diario.

   E inflacion lo ta pas “visibel” rond 2025. Pero den mi opinion e segunda ola di inflacion lo ta uno grave. Pa cu esaki pueblo por proteha nan mes cu Oro Fisico, cu semper a proteha inversionistanan den periodonan di inflacion halto.

   Un otro indicator masha fuerte pa cu inverti den Oro, ta cu e inversionistanan di mas grandi y strategico. Esta e Banco Central nan mes, ta cumprando Oro mane no tin mañan. Nos a wak aña pasa cu Banconan Central a cumpra Oro na un nivel casi record mes. Bezig ta wak cu inversionistanan grandi, strategico y cu hopi “insider information” ta cumprando riba nivel asina halto. Tambe ta indica cu “algo ta seriamente off” y cu e clase aki di inversionista ta pronostica cu inflacion lo hisa.

   En fin, e prijs di Oro riba nivel mundial esta den US Dollars, Yen Japones, Euro Europeo, Dollar di Australia y British Pound.

   Den tur e monedanan aki Oro ya caba ta na un nivel di record caba. Esaki ta pone mi como analista strategico pensa cu den un termino di 3-5 aña Oro lo proteha contra e inflacion halto cu ta na caminda.

   Nota Legal: E articulo aki NO ta uno pa specula pero miho como educacional pa adverti pueblo di Aruba di e opinion strategico personal di mi persona. Eta un opinion y no por wordo mira como investment advies per se.