E bon vibra di Burna Boy a yega Aruba!
WILLEMSTAD: Mientras e dianan ta acercando, preparacionan ta intensiva pa nos bai topa dia 28 di oktober fecha riba cual e magno concierto di Burna Boy ta tuma lugar na Corsow. E bon vibra di Burna Boy a yega Aruba! Den noticianan mas recien ta raporta cu Curacao Festival Center (CFC) a ricibi un ‘face lift’ di manera cu tur bishitante por sinti nan mes great diabierna anochi.
E cantante Nigeriano Burna Boy, ganador di Grammy ta den top di popularidad, sigur despues di su ultimo album titula “LOVE, DAMINI”. Damini Ebunoluwa Ogulu, Burna Boy, a caba di finalisa un tour sumamente exitoso na Merca. Despues di a tour ciudadnan manera Detroit, Atlanta, Minneapolis, Houston, Boston y mas den juli ultimo, BURNA BOY lo ta cu su banda na Corsow!
Sun Splash, un organisacion cu ta produci diferente festival na Hulanda ta forma equipo cu un team local pa presenta BURNA BOY na Corsow. Massive Productions cu sosten di Elite Productions di Aruba a keda apunta y encarga cu zonido, escenario, lus y produccion den Curaҫao Festival Center na unda BURNA BOY lo presenta dia 28 di oktober proximo cantando tur su exitonan y cu su banda completo manera ela haci recien na Madison Square Garden, NY! Pa esnan cu ta desea di bishita Corsow, por cumpra nan entrada adelanta via di caribbeanticketshop.com. Por a tuma nota cu mayoria aeroliña a habri vuelo extra pa bai Corsow, tumando nota di e interes grandi di Aruba pa cu e concierto.
Ambiente lo forma den seccion general:
E seccion general, lo ta yen di ambiente y esey por conclui na e benta di entrada .Tur atencion ta riba e area general; mundialmente esaki ta e seccion na unda cu e ambiente ta concentra. E pre-show ta completo! Entre FMG, B’JAY cu su live band, MC Chris Strick, MC Don T, Dj Krokzz, Dj Fab y Dj Lambo lo forma e ambiente pa ora Burna Boy subi escenario.
Ta pidi pa tur hende tuma nota cu ta importante pa for di 6’or cuminsa forma rij di entrada. Portanan lo habri 7’or di anochi y lo cuminsa mesora cu e line-up, un tras di otro. SUN SPLASH, Key Caribe y Unique Productions ta invita Aruba pa e concierto di BURNA BOY cu su banda na Corsow!
