Instancia NVWA di Hulanda na Aruba pa inventarisa siguridad di alimento

ORANJESTAD (AAN): Riba peticion di Directie Volksgezondheid Aruba (DVG), for di dia 15 te 28 januari 2026,

Nederlandse Voedsel- en Warenautoriteit (NVWA) tabata di bishita na Aruba pa eherce un inventarisacion di e situacion actual di siguridad di alimento.

   Durante e bishita aki, señor drs. Gabor van der Straten ta actua como representante di NVWA. E inventarisacion tabata enfoca principalmente riba produccion y importacion di carni y productonan di carni, y parcialmente riba pisca y webo. Siguridad di fruta y berdura no ta forma parti di e inventarisacion aki.

   E proposito di e inventarisacion no tabata un inspeccion, pero un bista di e funcionamento di e sistema na e momento. E enfoque tabata riba e estructura y funcionamiento di e sistema, y no riba persona. Crea cooperacion y transparencia ta esencial durante tur e proceso aki pa por crea un bon bista di e realidad.

   Durante e inventarisacion a wordo evalua: (*) E leynan y regulacionnan vigente na Aruba, kico tin y unda tin buraco.  (*) Con Aruba ta maneha carni den practica, desde produccion y importacion te na benta. (*) Kico ta cana bon y den cual area tin espacio pa mehoramento. (*) Unda tin riesgo potencial pa siguridad di alimento.

   E producto final di e proceso aki lo ta un raport di inventarisacion cu un evaluacion di e situacion actual di siguridad di alimento riba carni y productonan di carni na Aruba, cu recomendacionnan concreto pa fortalece leynan y supervision y crea colaboracion entre partnernan relevante.

   Cu e bishita aki, DVG ta reforsa su compromiso cu transparencia y mehoramiento continuo, cu e meta pa fortalece confianza di comunidad den e sistema cu ta proteha nan salud. Door di ehece nos servicionan y controlnan pa medio di nos seccionan Dienst Warenkeuring en Hygiene y Veterinaire dienst, DVG ta traha diariamente pa brinda siguridad, trankilidad, y contribui na bienestar y felicidad general di nos comunidad.