ORANJESTAD (AAN): Esaki ta un bon noticia! IPA a indica cu nan a habri inscripcion pa por sigui PDG-11.
E curso di Certificacion Pedagogico Didactico (PDG-11) ta un curso parcial pa e profesionalnan cu kier ta competente den e profesion di docente of educador.
Abo of un conocir di bo ta cla pa un cambio di carera? Semper bo tabatin aspiracion pa aporta na enseñansa? Bo tin afinidad y interes pa traha y yuda den e desaroyo di mucha y hoben? E ora ta PDG-11 di IPA ta na unda bo mester ta!
PDG-11 ta e di 11 grupo cu ta bay haci e curso aki y awo mas cu nunca mester probecha paso e programa completo ta renoba! Un team relativamente hoben, ambicioso, creativo y cu hopi experencia den enseñansa a bini hunto pa renoba e programa di PDG.
Loke ta nobo: Ata algun punto di salida aki cu ta innovativo y unico di e programa aki: (*) Un duracion total di 24 luna, pero cu oportunidad personalisa pa caba mas trempan den 18 luna! (*) ‘Deep learning’ cu hopi atencion y tempo pa practica y ta hands-on bezig. (*) Un team dinamico cu mas prioridad pa guia e desaroyo profesional y personal di cada participante.
Esnan cu por aplica na e curso aki: Esnan cu por haci esey ta: (*) Maestro cu ta traha no-certifica, esta ‘onbevoegd’ den enseñansa avansa e.o. EPI y MAVO. (*) Profesional di otro sector e.o. empresa of instancia cu no ta enseñansa, cu tin interes y motivacion pa sa mas di e profesion di educacion, y cu kier traha riba nan conocemento y habilidad pedagogico didactico. Pa e grupo di profesional aki PDG ta un rekisito pa drenta sector di enseñansa.
Rekisito pa por haci e curso di PDG ta minimo diploma di HBO.
Informacion di PDG-11: Tur informacion di PDG-11 ta riba website di IPA. Subi www.ipaaruba.com y click riba CDPC sigui pa ‘Opleidingen’ y despues PDG-11. Aki lo bo haya informacion di entre otro contenido di e estudio, kico bo por haci despues di e estudio, gasto y procedura di inscripcion.
Durante IPA su open dag, dia 4 di november 2023, lo ofrece dos sesion di informacion general di e curso di PDG-11 cu bo lo por atende. E orario di sesion 1 ta 10:30 am y di sesion 2 ta 11:30 am.
Inscripcion: Bo ta cumpli cu e rekisitonan menciona y ta desea di ricibi e Certificacion Pedagogico Didactico cu IPA ta ofrece? Bishita www.ipaaruba.com, bay na aanmelden y scoge pa PDG y sigui e instruccion. Ora ta bay pa yena e formulario digital, mester tin PDF di diploma(nan) y lista(nan)
di cifra ‘gewaarmerkt’ pa agrega esakinan na e formulario. E waarmerking ta sosode na Dienst Inspectie.
E ultimo dia pa inscribi ta 27 di mei 2024. Despues di e fecha aki no por inscribi mas pa aña academico 2024-2025.
