Minister Arends:
ORANJESTAD (AAN): Ministerio di Naturalesa ta lansando un proyecto piloto unda ta invita scolnan basico pa registra y asina haya chens di crea un plantacion di mata den forma di agroforesteria
sintropico, esta syntropic agroforestry.
E iniciativa aki tin como meta pa educa e siguiente generacion riba e balornan di agricultura sostenibel mientras ta promove un interes den sector primario. Muchanan ta haya e oportunidad educativo pa siña tocante agricultura sostenibel, uzando tecnicanan di agroforestry pa mehora e calidad di e suelo y elimina e necesidad di pesticida.
Ademas, e proyecto ta aporta na seguridad di alimentacion y autosuficiencia, cu un enfoke ariba scolnan cu por ta limita pa motibonan financiero.
Scolnan por cuminsa registra via e link AKI , of subi pagina di Facebook di Ministerio di Transporte, Integridad, Naturalesa y Asuntonan di Adulto Mayor, te cu 15 di november 2023. Un carta a wordo manda na bestuur di scolnan basico cu mas detayes relaciona cu e proyecto di syntropic agroforestry. 10 scol lo wordo selecciona segun criterionan specifico manera motivacion, tereno disponibel cu acceso na awa y coriente, y compromiso di scolnan.
Aruba ta enfrentando retonan relaciona cu su dependencia ariba importacion cual ta laga pueblo vulnerabel pa influencianan externo y fuera di nos control. E cambionan economico y aumento den costo di bida e ultimo añanan a inicia un combersacion tocante e importancia di seguridad alimenticio. Mientras Ministerio di Naturalesa ta colabora cu Santa Rosa y WEB pa asina baha e tarifa di awa pa agricultornan, tambe ta trahando pa inculca balor di plantamento den e siguiente generacion.
“Mi ta reconoce cu e tereno di agricultura ta evoluciona constantemente, y nos mester keda habri pa ideanan y metodonan nobo,” segun Minister Ursell Arends. “Aruba, cu ta wordo considera e isla mas seco den Caribe, mester ta innovativo pa supera e falta di tera fertil y awa. Pa es motibo ta haci uzo di tecnicanan nobo manera agroforesteria pa adapta y prospera den e condicionnan aki sin depende ariba pesticide.”
Ministerio di Naturalesa ta traha hunto cu Santa Rosa y Living Soil pa duna scolnan guia y sosten di material pa por crea plantacion di mata riba nan tereno. Ademas, personal di scol y boluntarionan lo ricibi training tocante e tecnicanan di agroforestry, mantencion y cuido di e plantacion di mata, como tambe e integracion di esaki den e curiculo escolar. Cu tur partners, nos por sigura un ehecucion exitoso di e proyecto, cuminsando na januari 2024.
