Nataleen Geerman ta splica:
ORANJESTAD (AAN) – Natalie Geerman, funcionario di Avond MAVO, a duna di conoce den conferencia di prensa reciente, cu awe for di awe, diabierna 1, te cu otro siman diahuebs 7 di Juli 2022, inscripcion pa Avond- MAVO ta tuma lugar.
Natalie a splica cu riba nan website por Wak cual ta e exigencianan pa drenta Avond- MAVO, pero tin alumnonan cu no ta logra cu e toelaten cu e scol tin, anto tin e posibilidad di haci un “instatus” na luna di Maart-April. Esaki ta pa personanan cu no tin e background pa drenta Avond-MAVO, pero si nan logra nan ta wordo getest riba nan Hulandes y rekenen. Si nan logra nan por inscribi na Avond-MAVO.
Natalie a comenta cu tin biaha nan ta purba di tur forma, via Departamento di Enseñanza, pa nan haya e papelnan cu realmente nan mester di scolnan bieu pa e studiantenan drenta Avond-MAVO.
El a agrega cu a base di e edad di e persona, nan ta haci un combersacion cune pa wak si e ta realmente interesa pa sigui studia, y tin biaha nan ta cera un contrato cu e alumno pa demostra cu enberdad e por handle e nivel di MAVO, y nan ta haya dos periodo pa nan por logra.
Geerman a señala cu e scol ta purba di haya e alumnonan corecto, pasobra den pasado nan a experiencia cu tin studiante ta keda seis aña den e mesun klas, of nan ta drenta pero e nivel no ta fit nan miho, y na luna di October nan ta cuminza cay afo.
Natalie Geerman a indica tambe cu como scol nan tin cu organiza nan mes. Nan tin como 70 docente part timers cu ta traha na Avond-MAVO y entre mas alumno nan tin, nan mester di mas docente, pero nan mester sa si e alumnonan lo por handle e nivel tambe.
El a menciona tambe cu edad di e studiantenan ta birando mas jong. Entre otro, pasobra tin mayornan cu no ta desea pa nan yiu bay EPB. Edad pa Avond-MAVO ta cuminza di 16 aña bay ariba, pero tin biaha nan ta haya yamada di mayornan cu tin yiunan den edadnan mas jong, pero door cu nan ta traha cu adulto, nan ta pensa cu pa mix e dos gruponan aki ta un tiki fastioso y delicado.
Mayoria di biaha e grupo ta den edad average di 18 pa 30 aña, cu ta esun mas grandi. Pero nan tin alumnonan tambe mas edad. E aña aki lo tin un studiante di 61 aña cu tin gana di bolbe scol, caba su MAVO. Pues, no tin edad pa siña. E grupo cu lo haci instatus na Maart-April, por prepara su mes via online y e ora ey nan por haci e toots pa drenta Avond-MAVO, Natalie German a informa.
