ORANJESTAD (AAN): E siman aki durante tratamento di casonan den apelacion, tabatin un ceremonia chikito di despedida di Abogado General mr. Deutekom, kende a haci su ultimo casonan di apelacion pa Ministerio Publico.
mr. Deutekom a cuminsa na Ministerio Publico como Fiscal y su trayectoria y experencia a haci posibel cu ultimo añanan e tabata e Abogado General na Ministerio Publico.
Como Abogado General, un di su tareanan ta trata e casonan di apelacion cu sea Ministerio Publico of e acusado ta apela. E ora ey Hof, tres Hues di Corte di Husticia di Curacao, ta bin Aruba pa trata e caso completamente di nobo y evalua si e sentencia ta corecto of no.
Den sala di Corte por nota cu mr. Deutekom ta defende su punto di bista cu hopi argumento y hopi biaha ta logra convence Hof, pa confirma e castigo cu e ta exigi.
Den e ceremonia chikito di despedida, Presidente di Corte Comun di Husticia di Antiyas Hulandes y Aruba, e Hues Arubiano mr. M.J. de Kort, hunto cu e Huesnan mr. R.L.M. van Opstal y mr. R. Veldhuizen , a gradici y elogia e bon trabao di mr. Deutekom.
