Segun Dr. Wilmer Salazar: ---*Ainda expertonan ta discuti riba e garantia di un di tres dosis
ORANJESTAD (AAN) — Ya a pasa seis luna cu e prome grupo di personanan 60 plus, a tuma nan vacuna contra COVID-19 na Aruba (ambos dosis) y algun a “tende” cu e periodo di proteccion ta seis luna, loke a trece preocupacion cune, cu nan ta kedando sin inmunidad.
DIARIO a consulta cu e experto docter Wilmer Salazar, un profesional hopi envolvi den e tema di COVID-19 y e vacunacion, y el a splica cu pa loke ta trata e vacuna (Pfizer) e estudionan cu a wordo haci te awor, ta indica cu despues di ocho pa nuebe luna, y hasta mas, di a ricibi e vacuna, ainda e persona tin anticurpa protector den su sistema.
E ta nifica cu e garantia di proteccion (inmunidad) no ta seis luna manera hopi hende ta profila basa riba publicacionnan no controla, atravez di diferente media.
Salazar a reitera cu e duracion di proteccion por dura ocho luna te un aña of kizas mas, depende si, di con e virus ta comporta su mes, si e ta sigui muta of no, y por supuesto di e inmunidad di e persona mes, si e ta cuida bon, si no tin problema immune of tuma tratamento inmuno-debilitante.
DI TRES DOSIS:
Encuanto e di tres dosis di e vacuna, docter Salazar a comenta cu expertonan ta den discusion, aunke tin varios pais cu a cuminza aplica esaki.
Tin discusion encuanto si enberdad un di tres dosis ta bay reforza e personanan mayor di 65 aña of cu tin algun condicion di halto riesgo, unda cu un di tres dosis por aumenta nan defensanan.
El a indica cu ainda e no a mira estudionan controla cu ta bisa si enberdad e personanan cu tin un problema di deficiencia inmunologico, ora nan aplica e vacuna nan sistema immune ta aumenta, pasobra por pasa cu e no ta aumenta nada sino cu ta yega teynan.
Por ehemplo, si e proteccion di e vacuna aworaki ta un 80-90%, pues pa e personanan cu tin un problema di riesgo di salud, den e parti di defensa inmunologico, e proteccion por baha na un 50% of 40%.
“Si efectivamente un di tres vacuna ta aumenta e defensanan contra e virus, esaki ta datonan cu e expertonan ta premirando, pero no tin un estudio controla, di manera cu no por asegura si e ta bay ta efectivo of no. No obstante, CDC ta promoviendo e di tres vacuna solamente pa e personanan mayor di 65 aña, pero cu algun condicion di salud, pa aumenta un poco nan defensanan”, Dr. Salazar a splica.
Salazar a reitera cu e no a mira unda e estudionan controla ta, no publicacionnan gewoon, pero controla, cu por asegura cu si ta aplica e di tres dosis na personanan cu tin algun problema den nan salud inmunologico, nan defensa contra e coronavirus por aumenta substancialmente.
Dr. Wilmer Salazar a reitera cu e ta kere cu esaki nan tine den expectativa. Tambe a reitera, cu e vacuna cu nos a haya, su inmunidad por dura ocho luna of mas, kizas te un aña, pero dependiendo di e comportacion di e virus. Pesey ta importante cu e mayor cantidad di hende den nos comunidad tuma e vacuna, pa evita cu e mutacion di e virus sigui avanza.
