Tempo ta entrega prueba di iresponsabilidad den uzo di placa di Pueblo - *Defensa di naturalesa mester di placa gasta den caretera peligroso - *Cambio di clima ta exigi fondonan cu proyectonan fantasma a abusa
ORANJESTAD (AAN) — Duna tempo na tempo. Esaki ta e gran berdad cu ta encera tambe cu nada ta keda scondi.
Mas tempo pasa, mas ta bini dilanti kico tabata bon y kico tabata malo den maneho cu a wordo uza cu placa di Pueblo na un pais.
Aruba, hunto cu henter mundo, ta enfrenta un situacion di gravedad cu ta urgi pa fondonan bira disponibel pa mira con ta bay atende cu loke ta directamente na peliger cu cambio di clima, cu a duna prueba cu e ta un realidad.
Awe Aruba mescos cu tur pais na mundo, mester di fondonan pa proteha naturalesa y comunidad contra hustamente e cambionan den naturalesa.
Aruba mester produci structuranan cu ta proteha su costa den tempo venidero, ora un mundo mas calor lo haci cu nivel di lama ta subi.
Cu futuro tabata contene peliger pa hende tabata conoci na momento cu Gobierno Mike Eman a introduci su famoso plan “Bo Aruba” cu cual Mike Eman a gana eleccion hunto cu e bahamento di BBO, cu ta e eror financiero mas grandi cu a wordo comete den historia di Aruba.
Cu DIARIO ta tene su mes na berdad y realidad ta wordo proba awe, cu Aruba mester cuminsa produci fondonan pa defende su naturalesa y hasta bida y calidad di bida di e Arubiano.
“Broeikaseffect” tabata e palabra Hulandes cu tabata skirbi na horizonte ora mundo a bandona Siglo 20 pa drenta Siglo 21.
Gobiernonan rond mundo a tene na consideracion cu un destino scur cu mundo y hende tabata enfrenta ora naturalesa cuminsa cobra pa e daño cu el a sufri.
Na 2021 mester atende cambio di clima como urgencia. Esaki ta encera medidanan cu ta yuda baha e peligro pero tambe ta defenda naturalesa di Aruba.
Kico lo pasa cu e beachnan di Aruba? Con mester cuminsa prepara e barionan cu ta keda cerca di lama? Kico lo pasa cu Spaans Lagoen y cu Bubali? Natural Bridge por keda atraccion na un costa Norte cu un futuro desconoci?
Na momento cu Gobierno Mike Eman a dicidi cu e ta bay uza 1.6 Biyon di Aruba, cu a haci posibel pa e partido di Mike Eman por a cumpra voto cu contractonan cu a reparti cu placa di Pueblo, Aruba ya tabata tin mester di e suma aki pa proteha su mes contra un futuro peligroso.
Hunto cu expertonan DIARIO a analisa con no solamente e suma di 1.6 Biyon no a wordo uza pa defende contra e peligernan di clima den futuro cu ya a cuminsa.
E placa a wordo gasta na crea mas peligro tambe.
E carteranan y rotondenan por ehempel a wordo construi na un forma cu ta bay contra e forma cu Aruba mester prepara pa yobidanan mas pisa.
Ora mira structura di e careteranan, e rotondenan y tur loke a cambia naturalesa na Aruba of a afecta pasashi natural di awa na Aruba, por mira cu e proyectonan PPS a haci e peliger mas grandi.
Si analisa loke a pasa, por nota cu placa mester a wordo utilisa pa mira con ta atende cu lineanan di beach na Aruba prome cu gasta 1.6 Biyon pa fontein.
Hunto cu expertonan DIARIO ta analisa un tema masha importante. Con Aruba ta bay inverti den defensa di e pais contra cambio di clima?
Pueblo di Aruba mester paga debe nacional, proyectonan di Bo Aruba y tur loke a keda atras pa un Pueblo como herencia di Gobierno Mike Eman cu aparentemente nunca a haya les den planificacion.
E gran victima di awe ta Aruba manera analisis di informacionnan pisa ta demostra.
Aruba awe mester cuminsa busca fondo pa enfrenta cambionan den naturalesa pero tambe pa deshaci di cambionan cu a wordo haci na naturalesa pa medio di e proyectonan Bo Aruba, e fondo di 1.6 Biyon di Pueblo cu mester a wordo inverti den infrastructura cu ta nifica creacion di base y no destruccion di loke mester wordo mehora.
