Jennifer Arends-Reyes parlamentario di AVP:
ORANJESTAD (AAN) Parlamentario Jennifer Arends- Reyes, den entrevista cu DIARIO a menciona cu fraccion di AVP a tuma nota di e publicacion di articulo 4 di e Mision 2025 di IMF, pa locual ta trata e check ups cu tin anualmente, tocante e desaroyo na Aruba.
Arends-Reyes a bisa cu e ultimo informacion aki a ser publica y nan ta señala diferente punto cu ta sumamente positivo pa loke ta trata e prestacion di Aruba.
“Den e parti di maneho pa loke ta trata e prosperidad comparti y tambe inversion strategico, nan ta subraya tambe cu e ta bon pa e caminda di bienestar di pueblo Arubano. Mi ta kere cu e mensahe aki di e Fondo Monetario Internacional ta refleha Aruba cu ta bayendo den un bon rumbo, basa riba e compromiso di firme pa logra un futuro for di prosperidad comparti, desaroyo sostenibel y bienestar real pa tur ciudadano”, e Parlamentario a subraya.
El a sigui comenta cu nan a menciona tambe e modelo di turismo cu e parti di e balor comparti, diversificacion tambe sostenibel. “Pa varios aña caba t’asina cu tin e modelo pa Aruba di ‘high value impact’ cu Aruba a adopta, y tambe akinan IMF a duna su respaldo pa esaki. E modelo ta simula un turismo cu menos impacto negativo riba medio ambiente y infrastructura mientras cu e beneficio ta yega mas directo na e comunidad Arubano”, Jennifer Arends-Reyes a señala y a agrega cu esaki mas di cerca e ta kere den e parti di AVP, y sigur nan ta mira esaki manera cu e mester yega mas posible na e ciudadano di Aruba y den e parti aki sigur, e ta trahando duro riba dje.
