Aumento di prijs di awa y coriente tin un impacto di 2.7%
ORANJESTAD (AAN): Relaciona cu e introduccion di e asina yama impuesto BTW, Minister Geoggrey Wever a duna di conoce cu ya caba e prome raport a drenta for di e professor internacional cu ta yudando cu e topico aki.
Relaciona cu e raport aki, ta planeando un presentacion e siman aki. E raport a keda cla siman pasa, y e siman aki ta bay ta haci e prome presentacion di esey.
E mandatario a agrega cu ora cu ta asina leu lo comparti e impacto di e estudio aki tambe cu comunidad.
E preocupacion ta hopi grandi y como gobierno nan ta hopi preocupa cu e aumento di e costo di bida y esaki ta algo cu ta monitor constantemente. Tin aumento di prijs di awa y coriente y esaki tambe ta bay tin impacto inflatorio, a bisa.
Aworaki cu e reduccion di prijs di gasolin cu diesel, y aumento di prijs di awa cu coriente ta bay tin un impacto riba luna di augustus di 4% riba inflacion. Tin un porcentahe base di inflacion entre 3 cu 4 porciento y e estimacion ta cu den luna di augustus ta bay ta entre 7 cu 8 porciento, a señala.
Esaki ta acorde cu e tendencia internacional unda por ehempel, na Merca e inflacion na juni tabata 9.3%, na Hulanda 8,6% na Juni y 10,3% na Juli. Ora cu ta papia di entre 7 y 8 porciento na Aruba, un pais cu ta importa tur cos, no ta mas locual ta sosodiendo internacionalmente.
Toch tin un factor importante pa considera pasobra ta scucha tur caminda cu ta papia di inflacion di 'dobel digits' y esaki na e momento aki no ta e situacion na Aruba. Mester purba di no crea panico y wak e situacion manera cu e ta, Wever a remarca.
Pa e motibo ey ta monitor inflacion continuamente y diadomingo el a haya e prome calculacionnan cu ta indica cu inflacion na Aruba den augustus lo ta entre 7 cu 8 porciento. Pa loke ta e impacto di e aumento di awa cu coriente so, segun e calculonan, esaki tin un impacto di 2,7% adicional den e 4 porciento cu a menciona, Minister Wever a splica.
