Industria di Timeshare a evoluciona drasticamente den e ultimo decadanan

Asociacion ATSA a haci analisis

• Nan ta describi 2023 como uno exitoso 

ORANJESTAD (AAN):  Miembronan di Aruba Timeshare Association, ATSA, a bini hunto den e celebracion anual di aña nobo na Las Ramblas, La Cabana Beach Resort & Casino pa disfruta di un anochi excelente mientras ta network cu otro y disfruta di dushi cuminda bao e streanan na Al Fresco Restaurant cu bista pa Eagle Beach.

            E representantenan di mayoria propiedad di Vacation Ownership a atende cu nan parehanan unda cu a disfruta di un menu varia brinda p’e team di Food & Beverage na Las Ramblas, combina cu cocktails y biña, y e resort su servicio excepcional di hospitalidad. Durante cocktail hour, prome cu cena tur hende a bay presencia e pool adulto nobo cu su stylish cabanas y hot tub, e centro di actividad y area di BBQ cu ta totalmente renoba manera tambe e bañonan cu a haya un update.

            Presidente di ATSA, Luigi Heredia, Costa Linda Beach Resort, a yama bon bini na miembronan ofreciendo nan un brindis p’e aña nobo, deseando nan exito continuo den 2024.

            Mirando atras, 2023 tabata un aña grandi pa Aruba su turismo. Durante periodonan di kwartaal unda cu a topa den varios encuentro di negoshi, ATSA su miembronan tabata semper bon informa cu cantidad di presentacion relata na asuntonan y desaroyonan actual den loke ta industria di turismo.

            Tabata tin presentacionnan pa Turtugaruba, Red Cross Aruba cu a habri e aña den bon forma. Edith van der Wal, Turtugaruba su presidente a pidi e resort pa acomoda e luznan pa asina nan por ta bon confortabel den e encuentro y presentacion cu nan lo duna.

            Tracey Werleman, Social Coordinator & Operations Red Cross Aruba, a duna un presentacion extensivo tocante actividadnan di Cruz Cora. ATSA ta un partner strategico di Red Cross Aruba durante ultimo añanan, y Werleman a gradici e organisacion pa renoba su contract di sosten.

            ATSA tambe a ricibi algun updates inderno for di e presidente Luigi Heredia tocante e programa anual di EPB su studiantenan di hospitalidad n’e propiedadnan. E iniciativa ta conta cu studiantenan di EPB Oranjestad y EPB San Nicolas pa un bishita tur aña cu ta yuda conscientisa nan mas den loke ta e trabao hotelero, e industria completo, di e forma aki plantando e simiyanan pa posibilidad di empleo den futuro.

            Jurgen van Schaijk di Amsterdam Manor, a update e miembronan regularmente riba actividadnan di TPEF, Tourist Product Enhancement Fund, riba e presupuesto aloca pa proyectonan pa futuro incluyendo esnan dedica na herencia, medio ambiente, atraccion, conscientisacion, inversion y embeyecemento.

            Pedro Vargas, Marriott Aruba Ocean Club a informa miembronan riba Security Foundation y acuerdo firma entre ATA, Aruba Tourism Authority y Security Foundation pa aumenta visibilidad di autoridad den area turistico.

            Segun presidente di ATSA, Heredia, e industria di Timeshare a evoluciona drasticamente den e ultimo decadanan y bira un opcion atractivo pa vacacion, particularmente pa clientenan mas hoben, y resultadonan ta papia pa nan mes. E productonan di Timeshare cu ta existi awe ta habri porta pa mas flexibilidad, doñonan ta disfruta di e opcionnan aki y ta sigui na bisa cu e flexibilidad general aki hunto cu oportunidadnan pa intercambio ta bira nan motibo principal den cumpra timeshare na Aruba.

            Minister Glenbert Croes, encarga cu Labor, Energia y Integracion a comparti informacion tocante e isla su progreso den admision, y cubri strategianan manera tambe iniciativanan relata na retonan di desempleo riba nos isla. El a priminti den mehora colaboracion entre gobierno y departamentonan manera DIMAS, DPL, cu ta encarga cu inmigracion y labor.

            Un representante di e minister di Turismo y Salud Publico a introduci e permiso di HORECA proponi, su gastonan y creacion di un autoridad nobo encarga cu esaki, y supervision bao di regulacion di licensia. E hunta supervisorio central aki, Aruba Quality & Hospitality Authority, AQHA, lo ta specificamente responsabel pa control di calidad pa reforsa esaki, manera un organisacion semi publico Sui Generis.
            ATSA tambe a ricibi update riba Aruba Hospitality y Security Foundation, AH&SF, awor cas di Tourism Security Patrol Aruba, TSPA, kende a lansa na december 2023. E presentacion pa Dylan Molina y Patrick Melchiors, a papia riba iniciativa nobo pa aumenta visibilidad di autoridad den areanan di Palm Beach cu Eagle Beach.

            Durante e aña, Rina Geerman, La Cabana Beach Resort & Casino, a reemplasa miembro retira di e hunta Jessica Franken, kende ta La Cabana su manager desde 1988, ganado di 2023 ARDA Awards of Excellence.

            ATSA tabata estableci na 1994, y actualmente ta conta cu miembresia activo di e mayoria propiedad di  vacation ownership aki na Aruba. E asociacion ta traha riba un nivel local, manera un miembro sostenedo di AHATA, Aruba Hotel & Tourism Association, y cu otro organisacionnan local, manera tambe entidadnan gubernamental. Riba un nivel regional, unda cu Aruba ta continua na ricibi reconocemento manera un modelo di vacation ownership number uno, ATSA tin relacion profesional cu Caribbean Hotel & Tourism Association, disfrutando di beneficionan for di un colaboracion continuo cu ARDA, American Resort & Development Association.

            Miembronan di ATSA: Luigi Heredia (Board President ATSA) Sulaika Kelly (Board Member ATSA), Pedro Vargas (Board Member ATSA), Rina Geerman (Board Member ATSA) Jurgen van Schaijk (Board Treasurer ATSA).