ORANJESTAD (AAN): Un relato nobo di Oficina Central di Estadistica, ta indica cu e Indice di Prijs di Consumo (CPI) pa luna di Juni 2021 ta 98.09,
loke ta representa un subida di 0.7% compara cu e indice di Mei 2021 (97.39) y acumulando un subida di 1.1% te cu na Juni di e aña aki.
E cambio di e CPI pa e ultimo diesdos (12) lunanan (Juni 2020 te cu Juni 2021) ta 1.0%, un subida di 3.9 punto di porcentahe (ppt) compara cu e periodo corespondiente di aña pasa (-2.9%).
E promedio anual di e tasa di inflacion pa e periodo di Juni 2020 te cu Juni 2021 ta -1.8%, un caida di 3.8 ppt compara cu e 2.0% registra den e periodo di Juni 2019 te cu Juni 2020.
Durante e luna aki, 6 di e diesdos sectornan a registra subida di prijs. E subidanan cu tabata tin e mayor efecto riba e CPI a worde registra pa e sectornan di “Transporte” (2.8%) y “Mobilario” (3.1%), causando un efecto di 0.36 y 0.28 ppt. E subidanan den e restante sectornan a contribui cu un efecto di 0.30 ppt riba e CPI di Juni 2021.
E subidanan aki a worde contraresta parcialmente door di caida den e indice di e sectornan di “Comunicacion” (-1.0%) y “Restante bienes y servicio” (-0.6%) cu a contribui cu un efecto di respectivamente -0.09 y -0.07 ppt riba e CPI di Juni 2021. E caidanan den e restante sectornan a contribui cu un efecto di -0.06 ppt riba e CPI di Juni 2021.
E subida den e sector di “Transporte” a worde causa door di principalmente un subida di 2.6% den e categoria “Gasto relaciona cu uso di vehiculo di transporte personal”, causando un efecto di 0.14 ppt. E subida den e sector di “Mobilario” a worde causa principalmente door di un subida di 15.0% den e categoria “Aparato pa uso domestico”, causando un efecto di 0.33 ppt.
E caida den e sector di “Comunicacion” a worde causa door di un caida di 22.5% den e categoria “Ekipo di telefon y fax”, causando un efecto di -0.09 ppt. E caida den e sector di “Restante bienes y servicio” a worde causa door di principalmente un caida di 6.2% den e categoria “Otro articulonan personal”, causando un efecto di -0.06 ppt.
Canasta di consumo:
E asina yama canasta di consumo di e CPI ta consisti di 408 bienes y servicionan. Compara cu Mei 2021, 47.5% di e bienes y servicionan aki a conoce un aumento di prijs causando un efecto di 1.39 ppt, mientras cu 36.5% ta mustra un caida di prijs, cu a contribui cu un efecto di -0.68 ppt y pa e restante 15.9% no tabata tin cambio den prijs.
Prijsnan di bienes a subi cu 0.6% y a causa un efecto di 0.37 ppt. Prijsnan di servicionan a conoce un subida di 0.8% y a causa un efecto di 0.34 ppt riba CPI di Juni 2021.
E CPIC (core inflation) - CPI excluyendo e efecto di energia y cuminda - a registra na Juni 2021 un caida di 1.6%. E indice di energia - cu ta consisti di e productonan: electricidad, awa, gasolin y diesel a registra un caida di -2.4%. E indice di cuminda a registra un caida di 2.5%.
Bestaansminimum: E bestaansminimum pa un hogar consistiendo di 2 adulto y dos mucha (edad 0-15 aña) na Juni 2021 ta Afl. 4,770, un caida di Afl. 12 compara cu Juni 2020 (Afl. 4.782). E bestaansminimum pa un hogar di 1 adulto ta Afl. 2,271, un caida di Afl. 6 compara cu Juni 2020 (Afl. 2.277).
