E homber cu a gasta 1.6 Biyon di pobernan awor kier rescata school - *Aruba mester di un Plasterk pa baha Mike for di Teatro Fort Zoutman - *E acuerdo Aruba/Hulanda mester a contene manual “Con pa Atende cu Mike”
ORANJESTAD (AAN) — Uno di e fayonan grandi den e acuerdo cu Aruba a firma cu Hulanda na 2020, ta e falta di un manual con Aruba mester atende cu Mike Eman, cu manera Tarzan ta bula riba tur loke e por presenta como obheto cu e mester rescata.
Na 2020, ora Prome Ministro Evelyn Wever-Croes a firma e acuerdo cu Reino pa recuperacion di Aruba, DIARIO a sostene e pensamento cu Aruba segun e acuerdo no solamente ta haya placa pero ta haya guia y sosten con pa recupera e Estado di Derecho di Aruba.
Cu Aruba tin necesidad di e guia aki, sigur a bini dilanti ora Ministro di Asuntonan Interior y di Relacionnan den Reino Plasterk, a atende loke Aruba mes no por a atende cu ta Mike Eman den su posicion favorito cu ta su estadia den Fort Zoutman.
E tempo cu Mike a drenta Fort Zoutman, el a ciega Aruba cu no por a mira cu porfin Mike Eman a alcansa uno di e logronan personal mas grandi den su bida.
Publico a reuni na Fort Zoutman cu un preocupacion enorme pa Mike Eman, cu tabata muri di hamber den Fort Zoutman, manera e tabata bisa. Cu na Aruba cantidad di hende tabata muri realmente di hamber pasobra placa cu mester a crea fondonan pa yuda nan cumpra pan tabata wordo uza pa ilusion di Mike Eman, e multitud no kier a ripara.
Fort Zoutman tabata un momento di gloria di Mike Eman cerca di su Penthouse y estatuanan di su tata y su padushi cu Mike Eman mester a uza pa ilustra con importante e ta. Cu si no ta pa Betico Croes, Mike Eman nunca por a drenta Fort Zoutman como Prome Ministro di Aruba, no a bini dilanti.
Mike tabata muri di hamber y placa tabata wordo gasta pa ambulance y asistencia medico di un homber yen di salud y bida, cu te awe ta disfruta di su bida y no a muri.
Hulanda a pone un fin na e wega y Mike a haya su mes forsa pa porfin pone fin na e drama den cual e tabata tin e publicidad total cu e mester pa e biba.
For di 2017 Mike a disparce pa de bez en cuando manifesta pa bolbe bay sconde mientras Arubianonan ta muri di hamber pasobra Mike a destrui nan situacion financiero y hinca nan den debe nacional pa no papia mes di e 1.6 Biyon pa tram, pa fietspad, pa brug y tur loke Pueblo bo por come pero a duna Mike Eman voto.
Mike a opta pa gasta placa na rail di tram y no na drecha schoolnan den su propio bario.
Awe Mike mester cumpra curason di Pueblo di Aruba y Mike ta bay rescata schoolnan pasobra Mike no tin nada di haci. E tin su penthouse y e sa con biba hasta sin traha.
DIARIO ta kere den hecho, cu solamente ta presente den historia. Y historia a duna prueba cu Aruba no por contra Mike. Aruba mester di asistencia tecnico di Hulanda cu ta hari Mike den su cara y nombra e Gouverneur cu ta nombra segun regla. Aruba mester di asistencia tecnico di Hulanda, cu ta exigi Mike baha for di su teatro y comporta su mes.
Hulanda ta exigi Mike pone fin na ridicules y cuminsa traha pa e tambe paga belasting pa asina Aruba tin fondo pa drecha tur school cu e no a logra drecha aunke el a crea debe nacional y sink Aruba cu e fondo di 1.6 Biyon cu el a maneha hunto cu su “back to back” Benny Sevinger.
