Ohala Aruba logra su 'herd immunity': -Admiracion total pa esnan cu a dicidi busca vacuna!
ORANJESTAD (AAN) – Bon por imagina nos mes, cu e mayoria di comunidad ta reaccionando hopi bon, dilanti e resultado di e vacunathon 3.O, Diadomingo cu a pasa.
No ta un conhetura sin mas. Tin comentarionan cu a drenta na DIARIO, cu ta trece e sensacion di speranza, cu por motiva mas hende pa vacuna, te cu nos yega e 85% pa logra e 'herd immunity' (inmunidad comunitario) asina anhela.
Esey kiermen tambe cu hopi ciudadano cu tabata tin duda debi na e propaganda anti-vacuna cu a circula na Aruba e ultimo lunanan, a drenta den un razonamento diferente, mirando e necesidad di busca nan vacuna.
Un di e personanan cu a tuma contacto cu redaccion a comenta cu dos bisiña di dje, cada un a perde un ser stima door di e virus cruel y su variante Delta, cu tabata personanan cu no a vacuna, y Diadomingo e dos bisiñanan aki a bay tuma nan vacuna.
Lamentablemente, tin cierto dirigentenan di secta religioso na Aruba, cu ta bishita famia, amigo, habitantenan den nan bario pa duna nan un predicashi contra e vacuna, cu segun nan, ta den Bijbel mes nan ta basa. No tur hende ta haci caso di nan, danki Dios, pasobra nan mes a bay busca den Bijbel y no a haya nada cu por referi na e vacuna contra covid. Pero otronan si ta kere. Nan ta uza e argumento di e chip, locual ta absurdo. Ken y con ta bay hinca un chip den curpa di hende via un likido? Cual compania farmaceutico cu ta bringando e virus espantoso yama Covid-19 y su variantenan, ta bay busca un daño mayor pa humanidad?
Berdad mester respeta e libertad di escogencia di cada ken. Di esnan cu ta opta pa e vacuna y di esnan cu no. Pero esnan cu ta opta pa no vacuna no ta respeta e opinion di esnan cu si ta kere den e vacuna, y semper tin hende cu un mente un tiki mas debil cu ta laga nan mes wordo convence pa e “cientificonan” sin estudio cu ta cana rond, cu noticianan robes y sin base, contra e vacunacion.
Ohala nos pueblo sigui haci caso di nan consenshi, cu cada ciudadano cuida su mes awe mas cu ayera, y asina consecutivamente, y cu cada persona vacuna convence otro cu no a hacie ainda, pa tuma e vacuna. No tin mas alternativa! Expertonan, keto bay, ta mustra esaki local y internacionalmente!
