Indicacion cu pinturanan di indjan den cuebanan na Aruba ta casi similar cu esnan na Suriname

Awenochi na Museo Arqueologico Arubano

• Porfin kizas a haya sa kico e nificacion di pinturanan ta 

ORANJESTAD (AAN): E arkeologo Dr. Aad Versteeg di Stichting Surinaams Museum ta biba na Hulanda, pero entre añanan 1988 y 2019 el a yega di haci investigacion arkeologico na Aruba tambe.

   E ta lansando e dianan aki un Buki nobo encuanto pinturanan cu a descubri riba barancanan na Suriname, y durante e investigacion ey nan a ricibi splicacion di indjannan cu ainda tabata na bida na e pais ey.  Y durante ta dunando splicacion riba e pinturanan riba e piedranan ey, mesora Dr. Versteeg a corda cu el a yega di mira algo similar na Aruba, tanto na Guadirikiri y Arikok.

   E pinturanan riba piedra na Suriname tabata exactamente e mesun tipo di forma, cu tabata cuadra cu e splicacionnan cu e indjannan tabata duna.

   Pesey Dr. Aad Versteeg a menciona esaki den su buki, y a pone imagennan di e pinturanan riba baranca di Aruba, banda di imagen di pinturanan riba piedra na Suriname.  Esey tabata loke a impulsa Fundacion 1403 y Museo Arqueologico di Aruba pa puntra Dr. Versteeg si e por duna splicacion riba e asunto aki na Aruba.

   Esaki ta loke Dr. Aad Versteeg a bishita Aruba, pa awe Diahuebs 7 di December 2023 duna un presentacion riba e topico aki.  Esaki lo ta pa 7:00 pm na Museo Arqueologico di Aruba.  E lo tin imagen audiovisual tambe pa publico mira.

   Aki Dr. Versteeg ta sigur cu lo tin hopi interes riba e topico, mirando e hecho cu semper na Aruba tabatin hopi atencion dirigi riba e pinturanan di indjan den cueba, y aunke no conoce hopi di e historia y background di loke a wordo pinta na Aruba, pero na Suriname si a logra haya un tiki detaye di e situacion aya cu e pinturanan indjan riba piedra.

   E lo elabora riba e nificacion di e pinturanan aki, y Dr. Versteeg ta kere cu kizas e splicacionnan aki lo por ta valido pa e pinturanan di indjan den cueba na Aruba tambe.

   Na final di su presentacion, e lo papia tambe di su buki nobo titula “The Archaeology of Suriname: The Werehpai Petroglyph Site”.  E buki no ta disponible na Aruba, pero e chens ta grandi cu kizas interesadonan por manda pidi esaki via di Museo Arqueologico Arubano, cu lo por manda busca un par.

   E buki ta contene informacion di 300 pintura riba piedra na Suriname, y mas patras tin e comparacion haci cu e pinturanan di Aruba.  E lectura lo cuminza pa 7:00 pm awenochi.