ORANJESTAD (AAN): Prome Minister Evelyn Wever Croes a hiba palabra durante e conferencia di prensa di Gobierno di tur Dialuna.
E mandatario a papia di e situacion di COVID-19 riba nos isla.
El a trece dilanti cu siman pasa den 7 dia nos tabata tin 27 caso nobo di Coronavirus, cu ta un average di casi 4 pa dia.
Prome cu siman pasa Aruba tabata conoce un average di 3 caso nobo di contagio pa dia.
“Nos tin 33 caso activo ainda y esey ta mustra riba e hecho cu e virus ta activo ainda riba nos isla”.
Di e 27 personanan cu a haya e virus siman pasa, 4 di nan tabata vacuna, esta casi 15%.
Esaki por tin di haber cu e variante nobo, pero e ta algo cu sigur nos mester tene cuenta cune.
Nos ta yama esaki e ‘breakthrough’ infections, segun Wever Croes.
El a splica cu si esaki ta un tendencia cu ta bay continua, esaki kiermen cu di tur esnan cu ta vacuna, 15% por core e riesgo di haya e virus toch.
E mandatario a indica tambe cu tabata tin 5 persona riba adfeling di hospital, di cual 2 ta turista.
Tabata tin 1 persona riba intensive care siman pasa.
Ningun di e 5 personanan aki tabata vacuna.
“Tur esaki ta bisabo cu apesar cu bo ta vacuna tin un chens di 15% cu bo por haya e virus, pero bo no ta bira asina malo di esaki cu bo mester wordo interna den hospital”.
Nos mester sigui cuida, pasobra tanten cu e virus tey e ta sigui un riesgo pa nos tur y specialmente pa esnan cu no ta vacuna, segun e Prome Mandatario demisionario.
El a sigui bisa cu e ta recomenda pa cada persona cuida su mes y cuida su famia.
Tene distancia y caminda cu bo no por tene distancia uza bo tapa boca.
Esaki ta conta specialmente pa esnan cu no ta vacuna.
“Gran mayoria di e adultonan cu no ta vacuna ta door di nan propio decision y nos como Gobierno ta respeta esaki”.
Sinembargo, e ta trece cune extra responsabilidad pa bo cuida bo mes aun mas y cuida bo famia aun mas.
Esnan cu no ta vacuna, mi ta urgi bo pa cana cu bo tapa boca, segun Wever Croes.
