Problema grandi den logistica
- Posibilidad cu e isla lo keda sin Pagara y Flowerbeds pa December
- Companianan ta nervioso pa transporta container cu explosivo
ORANJESTAD (AAN): Poco dia e informe a circula cu e cantidad di klapchi cu lo bay wordo bendi na Aruba, no ta suficiente pa cubri e demanda cu cada aña ta wordo sinti. Pero aworaki a bin tende cu companianan cu a manda busca cargamento di klapchi pa wordo bendi December venidero na Aruba, a topa cu un obstaculo grandi den caminda cu lo bay ocasiona un tardanza enorme.
E punto principal: Nerviosismo enorme ora di transporta e containernan di klapchi tanto riba barco of wanta riba waf ora di trans-shipment.
Aki ta hasta menciona cu kizas Aruba lo no bay haya e containernan aki mas na tempo, y kizas te na Januari nan lo wordo entrega na Waf di Barcadera. Tur esaki siendo cu pedidonan y pago pa container di vuurwerk a wordo haci desde Juni 2024 caba. Ta parce cu exportadornan na China a cumpli y containernan a wordo manda via un barco di un otro Shipping Line cu no ta esun cu den pasado tabata manda carga pa Aruba. E compania anterior a dicidi pa stop di transporta containernan cu explosivo aden, debi na un accident lamentabel cu un shipment den pasado.
Aparentemente e retrazo aki lo no tin di haber cu e dificultadnan cu tin cu secura y cruzamento limita di barconan na Canal di Panama. Pero e problema ta na un hub di carga cu tin na Jamaica. E barconan ta baha container di klapchi na Jamaica pa transshipment, y ta warda un otro barco cu lo trece nan pa Aruba.
Aki ta referi na Port Bustamante, cu ta e waf di Kingston (Jamaica), cu ta wordo considera como e Logistics Hub di Caribe. Y tur e containernan cu a yega cu klapchi for di China, y destina pa diferente pais Caribense ta stagna aworaki.
E asunto tin di haber cu un ley di como 100 aña pasa na Jamaica, cu ta e “The Gunpowder and Explosives Act”, cu por duna multa na e Capitan di un barco cu mara na e isla y tin abordo polvo of explosivonan peligroso, sin cu e tin un licencia of permiso.
Explosivo y nerviosismo: Parce cu a bolbe duna forza na e ley aki, como cu autoridadnan na Jamaica ta nervioso ora cu tin asina hopi container cu explosivo riba nan waf wardando riba trans-shipment pa otro islanan. Nan ta corda keto bay riba explosionnan cu a wordo registra na Wafnan na China.
Esaki ta e problema cu fabricantenan na China tambe mester a busca otro ruta pa exporta nan klapchinan, incluyendo nan famoso ‘Pagara’. E ta cay den un otro Categoria di vuurwerk cu ta haci shippernan hopi nervioso.
Pa tal motibo, importadornan na Aruba ta pensando di busca Klapchi for di e.o. Merca cu den pasado a yega di exporta Fireworks pa Aruba caba. Of kizas check cual isla den region lo por tin stock pa duna.
Suriname si a haya caba: Tabata na final di Augustus 2024, cu DIARIO a raporta caba cu Suriname si a logra haya containernan di klapchi. Un total di 5 container di 40-pia cada uno, yena cu klapchi a yega Suriname. Esey ta loke Cuerpo di Bombero di Paramaribo a confirma. Na e yegada, e servicio di inspeccion di Bombero a bay inspecciona e containernan aki tambe caba. Nan ta check si acaso tin tipo di klapchi cu ta prohibi na e pais, pero a topa cu nada ilegal den e containernan.
Suriname a duna permiso di awor caba desde 1 Augustus 2024 te cu 31 di December 2024 permiso pa klapchi wordo importa. Segun Gobierno na Paramaribo, autoridadnan na e pais a duna e aña aki 7 permiso di importacion di clapchi na e importadornan tradicional na Suriname. Importadornan na Suriname a raporta, cu e costo di transporte di klapchi a subi bastante, debi na e situacion insigur den Lama Cora.
Kizas Aruba lo bay check kico Suriname lo por tin pa manda pa Aruba? Of pa prome biaha Aruba lo bay conoce un cambio di aña sin klapchi, sin pagara, y sin flowerbeds pa bisa ayo na e aña bieu.
Algun hende a expresa caba cu nan lo keda contento si acaso no tin klapchi pa bende, como cu nan ta sinti cu nan cartera lo keda yen fin di aña, y kizas animalnan por pasa un siman sin stress y dolor di cabez pa doñonan.
