ImSan pensando pa bin cu Intensive Care tambe pa San Nicolas

Dr. Posner impresiona cu e desaroyonan nobo

ORANJESTAD (AAN): Tabata Diabierna cu staf medico y gerencia na ImSan a firma un protocol cu yama ‘Rules and Regulations’, cu ta empuha e instituto medico den un spectrum nobo pa garantiza bon dunamento di servicio.

   Uno di esnan cu a firma tambe, ta e specialista local Dr. Israel Posner.  Den un entrevista despues di a caba di haci esaki, el a splica cu e documento ey cu nan a caba di firma ta uno hopi importante.  Un meta cu nan a logra!

   Dr. Posner a splica cu ora el a yega na ImSan, e director Dr. Rajnherc a pidi’e pa setup full e sistema di anestesia y departamento di cirugia cu e momento ey no tabata existi ainda.  Nan tabata construyendo ainda e salanan di operacion.  Tin uno hopi moderno cu tabata wordo haci exclusivamente pa operacion di wowo, pero mester a setup e departamento.

   Tur loke ImSan a haci, ta pa setup e departamento y asina a haci miles di operacion na pashentnan cu debi na e Pandemia no por a bay den exterior. “Nos a haci e operacionnan aki mes y e mesun tempo tiki prome cu esey a cuminza cu Radioterapia.”  Pashentnan di cancer cu antes mester a bay den exterior pa haya bestraling cu Radioterapia, awor ta djis keda Aruba y ricibi esaki for di aparatonan sofistica cu tin instala na ImSan.

   “Awor nan ta djis bin ImSan, y despues di 5 pa 6 minuut den moda di papia, nan ta drenta bek den nan auto y sigui cu nan bida,” Dr. Posner a splica.  Pues no mester bay keda siman- of lunanan largo den exterior pa esaki mas.  “Tur e cosnan ey nos a haci den tempo di Pandemia.  Ora cu cosnan tabata dificil, nos mes mester a resolve tur nos cosnan,” Dr. Posner a indica.

   Den e temporada ey tambe, ImSan a haya reconocemento di Hospital.  Tambe a bin cu AruBIG cu ta hopi importante!  Hopi colega specialista, y incluyendo Dr. Posner mes cu a studia na Mexico, na Merca, y na Europa.  Kiermeen e ta sinti con importante ta pa AruBIG tin su mesun hendenan cu experiencia adkiri rond mundo.

   “Cu AruBIG, no solamente e specialistanan studia den region a haya reconocemento, sino cu ImSan a bira un Hospital tambe!  Pesey awe a introduci algo cu ta hopi importante den un Hospital, y esey ta ‘Rules and Regulations’, cu ta reglanan skirbi,” Dr. Posner a indica.

   Alavez a anuncia cu Departamento di Radioterapia y Oncologia a cumpli 2 aña di existencia tratando centenares di pashent.  E Departamento di Short Stay cu ta esun caminda cu ora di caba opera un pashent, nan por keda interna pa un par di dia pa recupera.  Esey ta algo cu antes nan no por a haci, si acaso e pashent tin di bay cas e mesun dia.  Pero cu Short Stay, nan por keda pasa anochi bao vigilancia medico.

   Dr. Israel Posner a duna un hint tambe cu ImSan ta trahando pa bin cu Intensive Care Unit (ICU) tambe pa San Nicolas.  Esaki lo bay acompaña cu tur cos necesario pa asina haci cuido di pashentnan aun mas skerpi, y usando reglanan pa asina garantiza calidad.

   ImSan ta entusiasma pa traha hunto cu Dr. Horacio Oduber Hospital.  Aunke segun Dr. Posner, e no ta compronde e “actitud” di HOH.  Segun Dr. Posner, e ta kere cu e Director actual na HOH no ta compronde bon e filosofia di esnan na ImSan, toch e tin di corda cu ta un isla nos ta.  Pero e coleganan specialista si tin bon colaboracion cu HOH.