ImSan orguyoso di a logra re-acreditacion di JCI un biaha mas

Nan ta e unico den Caribe Hulandes...

ORANJESTAD (AAN): Den fin di siman, diferente dignatario di Aruba tabata presente na ImSan na San Nicolas, pa festeha e hecho cu e instituto medico importante aki a logra haya acreditacion un biaha mas di JCI.

   Pesey a tene un celebracion di re-acreditacion di Instituto Medico San Nicolas (ImSan).  E prestigioso ‘Gold Seal of Approval for Hospital Accreditation’ a wordo duna door di Joint Commission International (JCI).  Esey nifica cu JCI a evalua e Hospital aki y a haya cu e ta cumpli cu e standardnan di calidad internacional pa cuido di salud pa pashent y maneho di organizacion. Presente tabatey Ministro di Salubridad Publico, Mervin Wyatt-Ras.  Tambe Parlamentarionan Jennifer Arends-Reyes, Dennerich Kelly, y Gino Goeloe.

   DIARIO a compronde cu e acreditacion aki ta wordo mira ampliamente como e ‘gold standard’ den industria di salud.  E proceso di evaluacion ta hopi rigoroso, y haci door di JCI mes, cu ta inspecciona varios aspecto di e entrega di cuido di salud, incluyendo cuido di pashent, siguridad di pashent, control pa infeccion, cualificacion di personal, liderato, y e experiencia en general di e pashentnan.

   Hecho ta cu no ta facil pa bo logra un acreditacion di JCI, y e ta sigur un testament di e trabao duro y dedicacion di henter e team na ImSan.

   E logro importante aki ta un reconocemento di e compromiso continuo cu calidad, siguridad di pashent y excelencia den cuido medico.

   Ministro Wyatt-Ras a declara cu e reacreditacion aki ta refleha e dedicacion y trabou colectivo di Hunta di Directiva, gerencia, profesionalnan di salud y e famia completo di ImSan. Mantene un acreditacion internacional ta exigi un compromiso cu calidad, seguridad di pashent y mehoramento continuo.

Den e momento special aki a recorda tambe e aporte di Director Drs. Joël Rajnherc, den feliz memoria, kende bao di su liderazgo ImSan a logra su prome acreditacion JCI na 2023. E logro aki ta un momento di orguyo pa ImSan, San Nicolas y henter Aruba. E ta reconoce e compromiso cu calidad cu ImSan ta demostra tur dia.

   Parlamentarionan presente a felicita directiva, mediconan, enfermeronan y henter e team di ImSan pa nan dedicacion y trabou incansabel.

   Pabien cu e re-acreditacion mereci aki. Sigui traha cu amor, profesionalismo y compromiso pa salud y bienestar di nos comunidad.  Potretnan aki pa cortesia di Ministerio di Salubridad Publico.